'Mental health emergency' ipinadedeklara sa pag-akyat ng student suicides
MANILA, Philippines — Nananawagan ang isang progresibong grupo ng kabataan kay Pangulong Ferdinand "Bongbong" Marcos Jr. na agarang magdeklara ng isang "mental health emergency" sa gitna ng papataas na bilang ng mga estudyanteng nagpapatiwakal.
Lunes lang kasi nang ipresenta ng Department of Education na umabot sa 404 estudyante ang nasawi sa pagpapakamatay habang 2,147 naman ang nag-suicide attempt noong taong 2021.
"Crunching the data, there had been more than one student who fell victim to suicide per day while roughly one student attempted to commit suicide every four hours in the past academic year. These are numbers we have never seen before," ani Kabataan party-list Rep. Raoul Manuel, Huwebes.
Mental health professionals sa eskwela kulang
Una nang iniulat na nasa 1:14,000 ang ratio sa ngayon ng mental health professional kumpara sa mga estudyante, malayo sa ideyal na 1:500 sa Pilipinas. Katumbas 'yan ng halos 2,000 guidance councilors sa 28 milyong mag-aaral.
Kung tutuusin, 1:250 pa nga dapat ang global ideal ratio nito, paliwanag ni DepEd Assistant Secretary Dexter Galban.
Sinasabing umabot sa 775,000 estudyante ang humingi ng tulong mula sa guidance services noong 2021, bagay na kumakatawan sa 2.85% ng total student population. Sa kabila nito, sinabi ni Galban na maaaring underreported pa ito dahil sa kakulangan ng councilors na kayang sumagot sa pangangailangan ng mga estudyante.
"In light of this, we urge authorities to declare a mental health emergency to give way for immediate and substantial government action to ramp up budget and support for mental health professionals and services. It's also best for Congress to exercise its oversight powers to check the implementation of the Mental Health Law so we can better address shortcomings," patuloy ni Manuel.
"Higit sa pagtugon sa mental health services, di natin maitatanggi na epekto rin ito ng higit dalawang taong pagsara ng mga paaralan at ang distance o hybrid learning modality na dumoble sa load at gastusin ng mga estudyante. In this regard, we also need a serious review and overhaul of education policies especially the K-12 while we ensure 100% face-to-face classes."
Taong 2020 lang nang lumabas sa pag-aaral ng Philippine Statistics Authority na tumaas ng 26% ang suicide deaths sa bansa kumpara noong 2019, panahon kung kailan talamak ang malawakan at mahihigpit na lockdowns laban sa COVID-19.
Nakatakdang maghain si Manuel ng isang resolusyon sa Kamara upang magdeklara ng isang mental health emergency habang iniimbestigahan at tinutugunan ang sitwasyon.
Babantayan din aniya ng Kabataan party-list ang pagpapatupad ng DepEd MATATAG Education Agenda na nangangako ng pagbibigay ng mental health services sa bawat paaralan.
Maaaring maabot ang National Center for Mental Health crisis hotline sa numerong 0917-899 8727 o 989-8727.
- Latest
