Trump, iba pang world leaders darating ngayon

MANILA, Philippines — Inaasahang darating ngayong araw ang mga world leaders kabilang si US President Donald Trump upang dumalo sa Association of South East Asian Nations (ASEAN) at East Asia Summits na idaraos sa Pilipinas.

Bukod kay Trump, kabilang sa inaasahang dadalo sa summit ang iba pang lider ng ASEAN na sina Sultan Hassanal Bolkiah ng Brunei; President Joko Widodo ng Indonesia; Prime Minister Thongloun Sisoulith ng Laos; Prime Minister Najib Razak ng Malaysia; Prime Minister Lee Hsien Loong ng Singapore; Prime Minister Prayut Chan-o-cha ng Thailand at Prime Minister Nguyen Xuan Phuc ng Vietnam.

Darating din ang mga dialogue partners na sina Prime Minister Malcolm Turnbull ng Australia; Prime Minister Justin Trudeau ng Canada; Premier Li Keqiang ng China; President Donald Tusk ng European Council; Prime Minister Shinzo Abe ng Japan; Prime Minister Narendra Modi ng India; Prime Minister Jacinda Ardern ng New Zealand; Prime Minister Dmitry Medvedev ng Russia; President Moon Jae-In ng South Korea; at Secretary General Antonio Guterres ng United Nations.

Nauna rito, dalawang world leaders na ang dumating sa bansa kahapon upang dumalo sa ASEAN Summit and Related Meetings.

Sinalubong nina Defense Sec. Delfin Lorenzana at dating Pangulo at ngayo’y Pampanga 2nd District Rep. Gloria Macapagal Arroyo sina Cambodian Prime Mi­nister Hun Sen at Myanmar State Counsellor Aung San Suu Kyi sa kanilang paglapag sa Clark International Airport sa Pampanga kahapon.

Ganap na alas-1:26 ng hapon nang lumapag sa paliparan ang eroplanong kinalululanan ni Sen at pagkalipas ng ilang oras ay dumating si Myanmar Counsellor Suu Kyi na kapwa ginawaran ng arrival honors.

Si Suu Kyi ang magsisilbing kinatawan ng kanilang lider na si President Htin Kyaw.

Si Sen ang kauna-unahang lider na dumating sa bansa para sa Summit na mainit na sinalubong din ng may 2,000 bata na nakasuot ng Filipiniana at sumasayaw ng traditional dance.