Duterte nilagdaan ang Executive Order sa pagpapatupad ng RH Law

MANILA, Philippines — Ipatutupad na ang Republic Act 10354 o ang Responsible Parenthood and Reproductive Health Act of 2012 matapos lagdaan ni Pangulong Rodrigo Duterte ang Executive Order 12.

Bahagi ng 10-point socio-economic agenda ng administrasyong Duterte ang pagpapatupad ng Reproductive Health Law.

Isa ang batas sa nakikitang paraan ng gobyerno upang makapagpasiya ng maayos ang mahihirap na mag-asawa para sa kanilang family planning.

Lumabas sa pagsisiyasat ng Philippine Statistics Authority na anim na milyong kababaihan, kung saan dalawang milyon ang mahihirap, ang walang modernong pamamaraan sa contraception.

"This Order aims to intensify and accelerate the implementation of critical actions necessary and sustain 'zero unmet need for modern family planning' for all poor households by 2018, and all of Filipinos thereafter, within the context of the [RH] Law and its implementing rules," nakasaad sa kautusan.

Inutusan ng Pangulo ang Department of Health, Commission on Population, Department of the Interior and Local Government (DILG) na makipag-ugnayan sa local government units sa pagpapatupad ng RH Law.

Kinakailangannaman gumawa ang Department of Education ng "gender-sensitive" at "rights-based" na sexuality education para sa mga paaralan.

Hindi naipatupad nitong nakaraang administrasyon ang RH Law dahil sa temporary restraining order na inilabas ng Korte Suprema.

Hinarang ng korte ang paggamit ng contraceptive implants na pumipigil sa kababaihan na mabuntis ng hanggang tatlong taon.