2016 MBC National Choral Competition
MANILA, Philippines – Inihayag na ng Manila Broadcasting Company at Star City ang mga korong maghaharap sa 2016 MBC National Choral Competition na gaganapin sa Disyembre 6-10 sa Aliw Theater.
Sa children’s division, lalabanan ng defending champion ang Casa del Niño Choral Ensemble, Musica Paulinos at Araullo High School. Ka-bracket naman ng Calasiao Children’s Chorus ang Pasig Catholic College, Tuguegarao West Central School, at ang Junior Varsity Chorale ng St. Paul College Pasig. Mga pampublikong mataas na paaralan sa Luzon, Visayas, at Mindanao ang magsusukatan ng galing sa paghaharap ng Cauayan National High School, Ilocos Norte National High School, Pavia National High School ng Iloilo, at ng Batanes National Science High School. Sa huling semifinal round, haharapin naman ng Dreamweavers Children’s Choir ng Koronadal ang Angelicus Children’s Choir ng Cebu at Voices of the South mula Davao.
Sa open category, aawit ang TIP Choral Society kalaban ng Coro Amadeo, Adamson University Chorale, OMPHP Youth Ensemble V, Tarlac State University Chorale, Voces Amicorum, at Carmelo. Sa ikalawang araw magtatagisan ang Coro Obcento, the Baganihan Singers, Coro Regina Coeli, San Sebastian Chamber Singers, Chorus Vocales Philippines, Urdaneta City University Music Ensemble, at ang St. Didacus Singing Ambassadors. Defending champion University of Baguio Voices Chorale naman ang haharap sa mga magiting na mang-aawit ng Koro Deo Duce ng Binan, CEU Singers Malolos, Dagalak ng Dr. Yanga Colleges Inc, Ramon Magsaysay Memorial Colleges’ Himig Chorale ng GenSan, at ang mga batang-Makati na Vosco. Sa huling araw masasaksihan ang Busan Festival Grand Prix winner Ligao National High School ng Albay kalaban ng Tarlac Chamber Choir, PUP Bagong Himig Serenata, EARIST Chorale, Quezon Science Madrigal Virtuosos, ICP Charismatic Chorale, at ng Iloilo City National High School.
Isandaang libong piso ang nakalaan sa tatanghaling kampeon ng children’s division at siyento-singkuwenta mil naman ng iuuwi ng magwawagi sa open category. Inaanyayahan ang publiko manood. Alas-singko magsisimula ang palabas araw-araw. Free admission.
- Latest
