2 sa shoplifting ring nasakote

MANILA, Philippines - Arestado ang dalawa sa pitong hinihinalang miyembro ng shoplifting syndicate na sakay ng isang van makaraang mag­­puslit ng dalawang lata ng powdered milk at 48 na piraso ng lotion sa isang kilalang mall sa Sta Cruz, Maynila kahapon ng tang­hali.

Nakapiit na sa Manila Police District-Station 4 ang mga suspek na sina Shiela Capito, 24, dalaga ng Blk. 21, Lot 7, Da­mata, Letre, Malabon City at Rolando Sagun, 53, driver, ng 928 Arias St., San Miguel, Maynila.

Sa ulat ni P/Supt Ramon Pranada, unang na­dakip si Capito na pa­pa­labas sa mall at nabawi sa kaniya ang dalawang pira­song gatas. Inalarma din sa pulisya ang pagsi­bad ng sasak­yang kinalu­lanan ng mga kasamahan ni Capito kaya nagkaroon muna ng habulan ng sa­sakyan na nagsimula sa mall sa Oroquieta St., Sta Cruz, Maynila at nagta­pos sa Sampaloc, Maynila.

Sa salaysay ng civilian security ng mall, dahil sa nadakip ang isa, nag­si­sakay ng van ang lima pang suspek at si Sagun at pinaharurot ang sasak­yan.

Nang humingi ng sak­lolo sa pulisya ang security personnel ay nagka­roon ng habulan hang­gang makorner si Sagun na na­bawian naman ng 48 pira­ng lotion na nina­kaw uma­no sa loob ng naturang mall.

Una umanong magka­ka­sama ang mga suspek sa kanilang get away vehicle na isang kulay dark green na Nissan subalit nang maabutan ay nawa­wala na ang iba pang sus­pek at tanging si Sagun na lamang na nagma­maneho ang nahuli. (Ludy Bermudo)