Nagbuwag na?

Carla-Tom

CEBU, Philippines — Nagbuwag na matud pa sila si Carla Abellana ug Tom Rodriguez. Mao kini ang nikatap nga tsika sa mga marites kagahapon sa social media.

Gibasehan sa mga tsismosa mao nga wala na gi-follow ni Carla ug Tom ang usa'g-usa sa Instagram. Salabtunon sab ang latest post ni Tom nga "float".

Ug ang reaksyon sa iyang followers kasagaran niingon nga i-ampo nila ang magtiayon. May nanawagan sab nga angayan nga dili gyud mo surrender sila sa usa'g usa kay "kaya nyo yan."

Gikasal sila niadtong October 2021.

Barbie-Diego

Nagbuwag na gyud matud pa sila si Barbie Imperial ug Diego Loyzaga. Suma pa sa tinubdan sa showbiz personality ug talent manager nga si Ogie Diaz, niabot sa punto nga gitubag nila ang pangutana: ipadayon pa o magbuwag na?

Ang magbuwag matud pa ang gipili sa duruha.

Naintriga man gyud ang mga netizen sanglit dihang gipangutana si Diego nganong wala nikuyog si Barbie sa iyang bakasyon sa Amerika, dili direkta ang tubag sa aktor. Niingon si Diego nga pagtuo niya dili ganahan si Barbie mukuyog, o kun ugaling mukuyog man gani, dili gihapon mahinayon sanglit wala kini visa.

Kana matud pa nga linya nga "pagtuo", nagpasibot nga wala sila direkta nga nagkaistorya. Wala sab matud pa magkuyog ang duruha adtong pasko ug bag-ong tuig.

Usa ka tuig na ang ilang relasyon.

Isla abs kun abs!

 Nagkagubot ang fans ni Julia Barretto human niya gi-upload kining mga hulagway niya nga may caption nga "Isla". Kini kay dili malalis nga husto kaayo ang pormada sa muscles ni Julia ug nigawas nga sexy kaayo siya. Kamatuoran nga daghang nakauyon mao nga nakadawat kini og 210, 758 like reactions sa IG sulod lamang sa 14 ka mga oras.

Dakong Buhi!

Gibasura ni Kris Aquino ang mga fake news nga nigawas sa nilabay nga mga adlaw kabahin sa iyang sitwasyon. Duha ka mga balita ang nikatap: kritikal ang kahimtang ni Kris, ug nipanaw na ang TV host.

Puros bakak. Dili tinuod. Ug kini maoy gitin-aw sa TV host pinaagi sa iyang latest IG post adtong Lunes sa gabii.

Matud ni Kris, dili siya kritikal. Igo ra siya ug ang iyang anak nga si Bimby nga naka isolate. Mahuman ang ilang isolation karong adlawa.

 “it’s been disturbing that since Friday so many have been spreading fake news about me being either in St Luke’s BGC or the States but always with the same theme, that i’m in the ICU and in critical condition. NONE OF THAT IS TRUE.

“ayaw akong tigilan ng #fakenews and parang sobrang excited yung mga trolls na within 1 year both Noy & me would pass away.

“Sorry to disappoint pero buhay at ilalaban pa na mapahaba ang oras ko because kuya josh & bimb still need me."

Dugang niini, nagpasalamat siya sa tanang nagpadala og bisan unsa ngadto nila samtang naka isolate, aron ipabatyag ang suporta ug gugma alang nila. Matud ni Kris, dili niya kini kalimtan ug isipon niya kini nga utang kabubut-on.

Loveteam na

Official nga loveteam na ang KdLex nila ni KD Estrada ug Alexa Ilacad nga namugna sa bag-ohay lang natapos nga Pinoy Big Brother Celebrity Edition. Sa nilabay nga adlaw, gipahibawo sa Dreamscape Entertainment sa ABS-CBN nga adunay mugnaon nga teleserye diin ang duruha maoy mga bida.

Civil lang

Giklaro ni Claudine Barretto nga "civil" na ang tinagdanay nila sa iyang ate nga si Marjorie. Niya pa, atol sa virtual presscon sa pelikula nila ni Mark Anthony Fernandez nga "Deception", ang maong tinagdanay nagpasabot nga wala nay gubot tali nilang duha. Nagkauban sila adtong New Year, ug naka bonding na matud pa niya iyang mga pag-umangkon. Kahinumduman nga nagkagubot sila sa haya sa ilang amahan duha ka tuig na ang nilabay, hinungdan nga wala sila magtagad. Samtang isalida na ang Deception sa January 28, pinaagi sa VivaMax.

Wala pay offer

Walay kasayuran si Sanya Lopez kabahin sa umaabot nga pantaserye sa GMA7 nga mao ang Sang'gre, hinungdan nga nakugang siya dihang gipangutana sa iyang fans mahitungod niini. Ang maong pantaserye, pinisik sa Encantadia. Mahitungod kini sa usa ka batang babay nga adunay superpowers. Ang wala niya masayri mao nga siya diay ang nawalang anak ni Sang'gre Danaya. Nidala isip Danaya si Sanya sa Encantadia Reboot, hinungdan nga naintriga ang iyang fans. Si Diana Zubiri ang original nga Danaya sa Encantadia.