Wala pa ka get-over

Gibutyag ni Meg Imperial nga wala pa gyud siya hingpit nga naka-recover sa depresyon nga iyang nasinati  human siya nahimong bida kaniadto sa seryeng  Moon Of Desire. Matud pa ni Meg nga naglaum siya og maayo nga magmabungahon ang iyang karera human sa maong serye apan kalit lang kini nga naudlot ug wala na madayon ang mga gisaad nga mga proyekto alang kaniya. Dugang pa ni Meg nga tungod sa maong depresyon, midako ang iyang timbang ug naglisod gyud siya sa pagpakunhod niini hangtud karon.

Gidayeg si Anne

Nakaangkon og mga pagdayeg ang pelikula nga gibidahan ni Anne Curtis nga "BuyBust" atol sa  world premiere niini sa New York Asian Film Festival. Dili lang ang pelikula ang natagad apan lakip na sab ang performance ni Anne. Hirit pa sa usa ka international critic nga “Dual Australian-Filipino national Curtis is convincing and charismatic as the determined and amazingly resourceful heroine. Performances from the rest of a huge cast are spot-on, right down to bit parts”.

Julia  midepensa kang Kris

Gidepensahan ni Julia Barreto ang co-star sa pelikulang I Love You, Hater nga si Kris Aquino tungod kay gibasol kini sa uban  nga matud pa  maoy rason  nga hinay  ang  kita niini sa takilya. “No she did not ruin the movie & no she is not spreading negativity. I can't imagine anyone else playing the role of Madam Sasha [role ni Kris]”, suma pa ni Julia.

Tinguha ni Sunshine

Padayon gihapon si Sunshine Cruz sa pagtungha pinaagi sa pagkuha og master’s degree sa Psychology. Matud pa ni Sunshine nga gusto niya nga sa pagtungtong niya og 50 anyos, usa na siya ka psychiatrist ug aduna na siya’y kaugalingon nga clinic. Tinguha ni Sunshine nga matabangan kadtong mga tawo nga nakasinati og depresyon sama sa iyang nasinati human sila nagbuwag sa iyang bana nga si Cesar Montano.

Walay bikil

Miulbo karon ang isyu nga matud pa adunay problema silang Sharon Cuneta ug Kris Aquino sa usa’g usa. Tungod kini sa wala pagkalakip ni Kris sa gi-congratulate ni Sharon sa Instagram comment niya sa post ni Julia Barreto. Giklaro ni Megastar nga wala sila’y bikil ni Kris sa usa’g usa ug wala pud siya’y plano nga maghimo og problema tali nilang duha.

Pangalan sa anak

Gikuha nila ni Ellen Adarna ug John Lloyd Cruz ang pangalan sa ilang anak nga lalaki gikan sa pangalan sa amahan sa aktres. Elias Modesto ang pangalan sa bag-ohay lang nga mipanaw nga amahan ni Ellen ug mao sab kini ang pangalan sa bag-ohay lang nga nahimugso nga anak sa celebrity couple.

Leading man ni Juday

Gitino na sa unit head sa Dreamscape nga si Deo Endrinal nga si Raymart Santiago ang mahimong leading man ni Judy Ann Santos sa comeback Kapamilya TV series niini nga Starla. Gawas ni Raymart, makauban sab ni Juday sila si Joem Bascon, Kathleen Hermosa, Anna Luna, Meryll Soriano, Gabe Mercado, Simon Ibarra, Bodjie Pascua, Joel Saracho, Janus del Prado, ug Joel Torre.

Gusto og farm

Tsika pa ni Mark Neumann  nga gipangandoy gyud niya nga makapalit og farm sa Batangas  hinungdan nga nisulod gyud siya sa showbiz.  Todo paningkamot gyud ang aktor sa iyang trabaho aron maangkon ang iyang pangandoy.

Sofia mibalik na

Daghang netizens ang nakugang sa kalit nga pagpatim-aw og  balik sa karakter ni Sofia Andres nga si Mayari kinsa giingon nga gipatay na sa istorya sa pantaserye nga Bagani. Maingon nga gipatay ang karakter ni Sofia kaniadto human sa mga nagpusot-pusot nga mga isyu nga iyang gikalambigitan. Tulo ka buwan nga nawala sa eksena si Sofia ug niadtong Martes lang, mibalik na siya sa pag-arte.

Gipangandaman gyud

Gipangandaman gyud pag-ayo ni Maxene Magalona ang pagbaton nila og anak sa iyang bana nga si Rob Mananquil. "We just want to do what feels right. And what feels right to us right now is just to solidify our foundation before we can even think of having kids. Kailangan handa kami”, suma pa ni Maxene.