“Goblin” star misuroy sa Bohol

CEBU, Philippines - Sekreto nga nibakasyon   ang  “Goblin”  star  nga si Kim Go-eun  sa Bohol sa miaging buwan.

Naboking ra kini tungod sa mga hulagway nga nikatap sa social media.

Kauban ni Kim ang iyang mga higala  nga nag-scuba diving sa Panglao, Bohol.

Ang hulagway naka-post sa Facebook page sa scuba-diving center sa  Bohol  nga Sinchun Divers.

Gitangtang na ang original photo niini apan duna’y pipila ka fans nga naka-screenshot na niini.

Nasayran nga sikat kaayo si Kim dinhi sa Pilipinas gumikan sa iyang role isip  Ji Eun-tak sa Korean series nga  "Goblin” nga kasamtangan gi-ere dinhi sa nasud. (Sanden J. Anadia)

Orange and Lemons pormahon og balik

Human  nahanaw sulod sa taas nga katuigan,  mopatim-aw og balik  sa music industry ang sikat kaayo nga grupo nga Orange and Lemons.

Niining higayona, wala na ang lead vocalist nga si Mcoy Fundales, apan banhawon gihapon kini  ni   Clem Castro ug sa magsuong  Ace ug JM Del Mundo. Kahinumdoman  nga nabungkag ang maong grupo niadtong  2007 .

"We badly miss the music so we decided to add a new chapter in the band’s short history," suma pa sa mensahe sa maong grupo nga gi-post sa ilang website.

Nagsugod na sila og luto sa mga awit nga malakip sa i-release nila  nga album ug  ilang gipasalig nga modugang sila og bag-ong putahi.

Ang  Orange and Lemons   maoy nagpasikat sa awit nga  "Hanggang Kailan" , "Isang Gabi," ug sa theme song sa Pinoy Big Brother nga "Pinoy Ako".

Sila usab ang nagkanta sa  Abot Kamay  nga nisikat og samot human kini gigamit  sa usa ka shampoo commercial.

Ang mga nangagi nila nga album naglangkob sa "Love in the Land of Rubber Shoes and Dirty Ice Cream" , "Strike Whilst the Iron Is Hot" ug  “Moonlane Gardens.”  (Sanden J. Anadia)

Gikalipay ang pagkompara

Giisip sa Kapuso star nga si Kate Valdez nga usa ka dakong dungog alang  kaniya ang obserbasyon sa mga tawo nga matud pa  ka-look a like niya ang Kapamilya Star nga si Angel Locsin. Sigon pa sa 16 anyos nga aktres nga  paborito gyud niya  si Angel ug giisip niya kini nga usa sa mga banggiitang artista sa industriya. Komedya pa niya, nga unta dili masuko kaniya si Angel kung magkaabot sila niini.

Dili uyon sa Live-in-relationship

Miangkon ang aktres nga si Bea Binene nga dili siya uyon sa live-in relationships kay matod pa dili na kinahanglan mosuway pa og puyo-puyo aron  lang mahibaw-an kung mo-work ba gyud ang relasyon.

Wala’y kompetisyon

Gikataw-an lang sa Kapuso hunk nga si Jay Arcilla ang isyu sa pagkompara nilang duha sa Sugbuanong aktor nga si Dave Bornea. Giingong mas daghan og proyekto karon si Dave ikompara ni Jay bisan pa man nga wala kini  nasulod kaniadto  sa top 6 sa  StarStruck. Dugang pa niya, nagdepende sa role ang ilahang proyekto kung haom ba sa nagkadaiya nila nga personalidad.

Sekreto una

Nagdumili pagbutyag ang aktres nga si Barbie Forteza sa identity sa gidungog niya nga special guy. Gusto siya og tulin nga relasyon   busa dili na kini kinahanglan nga ipublikar.

Gituboy isip ambassadress

Gikuha isip Ambassadress of Goodwill sa Philippine Chinese Charitable Association Inc. kon  PCCAI ang Kapuso star nga si Glaiza de Castro. Gikalipay kini sa aktres kay matod pa mas mapalapdan pa ang iyahang charity works ngadto sa mga kabatan-onan nga  gitabangan   sa iyang Glaiza de Castro Foundation (GDCF).

Sarah gisurpresa

Nihimo og surprise appearance si John Lloyd sa programang The Voice Teens atol sa early birthday celebration ni Sarah Geronimo niadtong Sabado. Nilugwa og kalit  ang aktor  ug nagdala og buwak alang sa co-star niya sa pelikulang "Finally Found Someone". Ipasalida karong Miyerkules ang bag-o nilang pelikula  ubos sa direksyon ni Theodore Boborol.

Single gihapon

Wala matud pa nasuya si Yassi Pressman sa bongga nga love life sa best friend niini nga si Nadine Lustre. Single gihapon ang aktres karon ug nibutyag nga wala pa siya'y plano nga mosulod og relasyon sa pagkakaron. (BANAT NEWS)