Your Highness, Inday Bambina!

Nagtubo ko sa isla sa Pilar, Camotes nga nag-atang sa matag niya pagtingog sa dyHP kaniadto. Ang iyang showbiz news maoy nagtudlo kanako nga aduna diay ingon niana nga kalibutan—kalibutan sa mga artista. Hinungdan nga nahugyaw ko dihang atol sa News and Public Affairs Night sa Cebu Broadcaster's Month celebration niadtong September 26, diha sa Sugbutel, kami man diay'ng duha ang magco-host. Nahugyaw ko nga nakulbaan at the same time, kay maminaw ra baya ko niya sa una, nipakpak sa iyang mga pakatok sa radyo, ug sa wala lamang damha, siya na akong co-host.

 Oh well, kahibaw ko nga ako gyud maoy mag-host, pero wala koy idea nga siya diay akong pares. Gipangutana ra ko ni Aida Tampus of dyHP okay ra ba ko nga ako rang usa, maong akong gitubag nga mas maayo kun naa koy pares. Naa koy gihatag nga name,pero what a very pleasant surprise kay si Inday Bambina man gyud, ang akong napares. Pakpak!

Lingaw kaayo si Inday Bambina ikauban uy. Labihan ka professional. Dili siya ganahan nga adunay dead air ug ma-drag ang show. Dili sab siya mamugos kun dili mu-participate ang audience kun mag-games. Magmatngon sab siya sa iyang mga pakatok, ilabi kun adunay mga bata sa audience. Pero labihan ka paspas niya makamugna og istorya uy, ug sigurado gyud ka mga magkatawa. Timing kaayo siya mu-deliver og punchlines. Very witty siya nga pagkatawo. Usa ka talagsaong gasa. I have learned so much from her bisan sa hamubo lamang nga higayon nga nag-share mi og hosting assignment.

Maikuron sab siya ug mapaubsanon. Ganahan kaayo ko maminaw  kun hinumduman na niya giunsa niya pagsugod sa natad sa panibya. Dili sab siya garaon, dili niya ipa-feel nimo nga banggiitan na siya niining industriya nga among nahimutangan. Muhatag siya nimo og chance. Dili siya sab hambog. Nindot kaayo siya ikatrabaho gyud. Ug siguro maayo among unang panagpares kay gipa-host man ming duha pag-usab sa Cebu Broadcaster's Month culminating party niadtong Martes sa gabii. I adore Inday Bambina to the highest level. Bravo to you your highness! Ikaw ug ikaw gyud ang "Queen of Radio Entertainment Hosting" sa Kabisay-an ug Mindanao. I bow down to you! Pakpak

Reaksyon? I-text ka na dungan sa imong ngalan ug address ngadto sa 0928-9903-058. Madungog sab ko ninyo sa okRYAN sa dyRC-Radyo Calungsod, matag 10am to 12noon, Lunes hangtud Biyernes nga tanan.