NLEX garantisado nang twice-to-beat
CEBU, Philippines — Ang NLEX Road Warriors milampaso sa Converge FiberXers, 100-81, aron pag-angkon og twice-to-beat nga bentaha sa quarterfinals sa PBA Season 50 Commissioner’s Cup niadtong Sabado sa gabii didto sa Ninoy Aquino Stadium sa kaulohan.
Sila si Cady Lalanne, Schonny Winston ug Robert Bolick ang responsable pagsilyo sa Road Warriors og luna sa Top 4 uban ang 9-2 nga baraha.
Si Lalanne miharos og 22 puntos ug 14 ka rebounds samtang sila si Winston ug Bolick midugang og 21 puntos matag usa alang sa Road Warriors, nga dalaygong namawi human maalkansi og dos puntos sa halftime aron lat-an ang FiberXers og 19 puntos.
Ang NLEX mosuway pagbira sa numero unong puwesto sa katapusan nilang duwa sa eliminasyon batok sa Titan Ultra karong Miyerkules, Mayo 6.
Si Justin Arana mitali og 21 puntos alang sa Converge, nga natagak sa 4-7 ug wala nay tsansa nga makasud sa sunod nga hugna sa torneyo.
- Latest
