Chooks Pilipinas 3x3 season Cebu mo-host sa unang LEG

CEBU, Philippines — Sa maanindot nga kalamboan sa Cebu sports, ang probinsiya maoy mo-host sa buena manong leg sa  2021 Chooks-to-Go Pilipinas 3x3 season nga tentatibong gikatakda sa ikaduhang semana sa Mayo sa wala pa hisayring binyu.

"We see VisMin as a good venue to kick-off our 2021 Chooks-to-Go Pilipinas 3x3 season.  A lot of our 3x3 players are from there and the passion for the sport of its people is overwhelming. We hope to do a conference each in Visayas and Mindanao to bring the sport closer to the fans," matud pa ni  Bounty Agro Ventures Inc. (BAVI) President ug Chooks-To-Go Pilipinas Commissioner Ronald Mascariñas.

Si Rhose Montreal, ang executive vice president sa NBL-Pilipinas ug utok sa WNBL, ang labing unang propesyonal nga liga alang sa Pinay nga mga basketbolista, nagkanayon nga ilang dad-on dinhi sa Sugbo ang liga gumikan kay sayod sila nga daghan og talento dinhi nga dunay kapasidad nga mohimo og pangan sa natad sa 3x3 basketball.

Si UV Lancers head coach Gary Cortes maoy gitahasan pagtabang sa pagpadagan ning Chooks 3x3 Visayas leg nga abli sa mga commercial ug LGU teams.

Dose lamang ka teams ang gitagana sa Visayas leg ning nasudnong torneyo. Matag teams langkuban og upat ka miyembro diin ang duha niini puwedeng mga players sa CESAFI.

Aron ang mga CESAFI players makasalmot ning propesyonal nga liga, kinahanglan sila nga molukat og SGL (special guest license) gikan sa Games and Amusements Board (GAB). Usa kini ka pribelihiyo nga gitanyag sa GAB ngadto sa mga collegiate players aron makaduwa sila sa pro nga dili mawala ang ilang amateur status ning panahon sa pandemiya.

Ang mga organizers mopadala og suwat ni CESAFI commissioner Felix  'Boy' O. Tiukinoy Jr. kabahin sa ilang intensiyon nga makig-partner sa primerong liga sa Sugbo.

Gawas sa Cebu, imbitado sab ang mga teams gikan sa Iloilo, Bacolod, Dumaguete ug Bohol sa torneyo.

Ang umaabot nga liga dili duwaon ubos sa bubble set-up gumikan kay usa lamang kini ka adlaw nga kompetisyon, apan ang tanang mga partisipante i-monitor sud sa 15 ka adlaw sa dili pa magsugod ang aksiyon isip kabahin sa istriktong patakaran sa panglawas ug kaluwasan nga ilang ipatuman. Gawas niini, ang tanan ipaubos sa Covid-19 tests ug kadto lamang dunay negatibo nga resulta ang pasudlon sa binyu sa adlaw sa mga duwa.

Ang nag-unang tulo ka mananaog makadawat og ganting salapi, samtang ang makampiyon moabante sab sa national finals didto sa kaulohan.