E-Painters, Gin Kings 3-0 na
CEBU, Philippines — Si Rey Nambatac milansang og duha ka krusyal nga free throws sa nahibilin nga 1.3 segundos sa duwa aron aswaton ang Rain or Shine Elasto Painters ngadto sa 70-68 nga kadaogan batok sa NorthPort Batang Pier sa PBA Philippine Cup bubble play didto sa AUF Sports Arena sa Angeles City, Pampanga.
Alkansi og sayes puntos sa halftime, gilimitahan sa E-Painters ang Batang Pier ngadto lamang sa dos puntos sa ikatulong kuwarter aron kontrolahon ang duwa.
Nakatabla pa hinuon ang NorthPort, 68-68 sa nahibiling 3.3 segundos, apan nakahimo og dakong sayop human ilang gi-foul si Nambatac, kinsa yano sab ayon mipasud sa iyang free throws aron pagsilyo sa daog sa E-Painters.
Ang rookie nga si Adrian Wong mitali og 15 puntos, samtang sila si Sidney Onwubere ug Nambatac nagkumboya og 21 puntos alang sa E-Painters nga misutoy ngadto sa ikatulo nilang sunod-sunod nga daog. Samtang ang NorthPort naminghoy kay nasagunsonan og tulo ka pilde.
Sa laing aksiyon, si Japeth Aguilar mikadlit og 20 puntos aron pangulohan ang Barangay Ginebra Kings ngadto sa 105-91 nga demolisyon sa Meralco Bolts.
Sila si Stanley Pringle, Jeff Chan ug rookie Arvin Tolentino mikisaw sab pinaagi sa pagkumbinar og 39 puntos alang sa Ginebra nga dominante kaayo ug sa usa ka higayon naglabaw og 24 puntos dayon na ngadto sa pagposte sa ikatulo nilang sagunson nga daog.
- Latest
