Tropang Giga, E-Painters pabiling wa'y pilde
CEBU, Philippines — Ang TNT Tropang Giga ug ang Rain or Shine E-Painters nagpabiling wa'y pilde human sa unang semana sa aksiyon sud sa PBA bubble didto sa Angeles University Sports Arena and Cultural Center sa Angeles City, Pampanga.
Si Poy Erram mipabuto og career-high 27 puntos ug milangkat og 15 ka rebounds sa Tropang Giga nga mitumba sa San Miguel Beermen, 107-88 aron pag-angkon niini sa temporaryong liderato bitbit ang perpektong 3-0 record.
Mikisaw sab si Bobby Ray Parks uban ang 22 puntos ug ingon man sila si Troy Rosario ug ang Sugboanong si RR Pogoy. Si Rosario mikadlit og 16 puntos ug walo ka rebounds, samtang si Pogoy miamot og 15 puntos.
Wala nang daan ang Sugboanon nilang alas nga si six-time MVP June Mar Fajardo nga nagpa-alim pa sa iyang injury, nasamotan pa ang kalbaryo sa Beermen human naangol ang abaga ni Terrence Romeo.
Usa kini sa mga hinungdan nga nakatilaw sila og duha ka sunod-sunod nga pilde sa bubble play.
Sa laing duwa, si Rey Nambatac mitali og 19 puntos, si Javee Mocon mihipos og 14 puntos ug 10 ka rebounds, si Beau Belga dunay 14 puntos ug walo ka rebounds, samtang si Gabe Norwood mikolekta og 14 puntos, unom ka rebounds ug upat ka assists sa E-Painters nga mibuntog sa TerraFirma Dyip, 91-82 alang sa ikaduha nilang sagunson nga daog.
- Latest
