Casimero pabiling kampiyon

CEBU, Philippines — Taas-taas man tuod ang iyang paabot nga milanat og walo ka bulan, apan wa'y pagbahar ang abilidad ni three-division world champion John Riel "Quadro Alas" Casimero human gipatikangkang  ang kanhi wa'y pildeng African challenger nga si Duke Micah sa Ghana sud lamang sa tulo ka hugna aron pagpabiling  WBO bantamweight champion kagahapon didto sa Mohegan Sun Hotel and Casino sa Uncasville, Connecticut.

Mao kadto ang labing unang pagdepensa ni Casimero sa korona nga iyang nasakmit human gipalukapa ang kanhi kampiyong si Zolane Tete sa South Africa sud gihapon sa tulo ka hugna niadtong Nobiyembre 30, 2019 didto sa Birmingham Arena sa United Kingdom.

Gikan sa pagsugod, agresibo kaayo ang 31-anyos nga si Casimero nga mipatugpa og solidong wala nga suntok ngadto sa ulo nga nakapabangog ni Micah dayong hagba sa sawog sa sayong bahin sa ikaduhang hugna.

Bisan og klaro kaayong nalipong pa, mibangon si Micah, apan gikulata na sab kini ni Casimero.  Nakalingkawas man tuod si Micah sa maong hugna, apan klaro kaayong oras na lang ang gipaabot sa dili pa siya tapuson ni Casimero.

Padayon ang makalilisang niyang opensiba sa ikatulong kuwarter, si Casimero mipatugpa na sab og gamhanang left uppercut sa apapangig nga maoy nakapabarag pag-usab ni Micah.

Modasdas na sab unta og ataki si Casimero, apan si reperi Steve Willis dali nga mibabag aron hunungon ang away sa oras sa 54 segundos sa ikatulong kuwarter aron ilikay si Micah sa dugang kadaut.

Si Casimero miinat sa iyang rekord ngadto sa 30-4 nga gidayan-dayanan na karon og 21KOs, samtang si Micah nakatilaw sa una niyang pilde sa 25 ka away uban ang 19KOs. Human sa iyang kadaogan, si Casimero mihagit og usab sa wa'y pildeng WBA/IBF champion nga si Naoya "Monster" Inoue (19-0, 16KOs) sa Japan alang sa usa ka unification bout. Orihinal unta silang mag-abot niadtong Abril, apan gikanselar kini ni Top Rank promoter Bob Arum gumikan sa pandemiya.