UP coach perasol taas og paglaum kang Jancork Cabahug

CEBU, Philippines — Ang pangan ni University of the Philippines basketball coach Bo Perasol mitagring sa mga Sugboanon pipila ka adlaw pa lamang ang milabay human si University of the Visayas (UV) All-Star forward Jancork Cabahug mibiya sa Green Lancers aron moabli og bag-ong panid sa iyang karera uban sa up Fighting Maroons sa UAAP.

Ang 21-anyos nga si Cabahug nga nakadaog og duha ka kampiyonato ug gibayaw nga All-Star MVP sa high school ug college sa pito ka tuig niya sa UV, usa sa unom ka players nga mibiya sa Cebu Schools Athletic Foundation, Inc. aron mangindahay sa Manila duha ka bulan human gikanselar sa CESAFI ang tibuok niining 2020 season gumikan sa pandemiya.

Ang sama niyang All-Star teammate nga si Gabriel Cometa padung sa San Beda Red Lions sa NCAA.  Si Nathan Montecillo sa USC Baby Warriors mitapon sa UP Integrated School (UPIS) juniors squad, samtang sila si reigning CESAFI Juniors MVP Leobert Andrew 'LA' Casinillo sa SHS-Ateneo de Cebu Magis Eagles ug Vincent Raymund 'Soysoy' Escobido ug Nichole Jay Cabanero sa Don Bosco Greywolves gibira sa UST Tiger Cubs sa UAAP.

Ang 48-anyos nga si Perasol nagkanayon nga taas kaayo ang iyang pagtan-aw sa mga Sugboanong players ug ang 6-foot-3 nga si Cabahug usa sa makapalig-on sa puwersa sa UP samtang sila nangandam sa ilang kampanya sa UAAP Season 83 sunod tuig.

"I can see in him (Cabahug) the same toughness in the Cebuano players I had in my previous teams. You can sense his hunger and drive to prove himself. Those qualities are very crucial in the character of a very good player," matud pa ni Perasol, nga kanhi coach sa Ateneo sa wala pa mitikang sa UP.

Sa wala pa sila nagtikawtikaw sa UAAP, si Perasol kanhi nagsilbeng head coach sa Air21 Express ug Coca-Cola Tigers sa PBA.  Mga Sugboanon nga nag-agi sa mga kamot ni Perasol sa UAAP mao sila si Paul Desiderio, Jun Manzo, Janjan Jaboneta ug Henry Asilum.

Sa UP,  makauban ni Cabahug ang mga katalilungsod niyang sila si Pio Longa (SHS-Ateneo de Cebu) ug Conrad Catapusan (USC Warriors).

Matud pa ni Perasol nga dili siya makapasalig kon unsay iyang mahimo ni Cabahug kay pamatud-an pa man niini ang iyang katakus sul-ot ang uniporme sa Maroons.

Apan uban sa taas niyang paglaum ug pagsalig ni Cabahug mao ang usa ka tambag.

"There are no assurances. What will be given to him is an opportunity to prove himself," dason pa ni Perasol. "Jancork has just to live up to what he can do and keep on improving every time. I believe in what he can do. The rest is up to him.".