Embiid bida sa Sixers
Cebu, Philippines — Si Joel Embiid mikadlit og 38 puntos uban ang 13 ka rebounds alang sa Philadelphia 76ers nga mipakaging sa Boston Celtics, 115-109 sa duwa nila sa NBA kagahapon didto sa TD Garden sa Boston, Massachusetts.
Ang higanteng sentro mihipos og 16 puntos sa katapusang kuwarter, apil na ang lima ka free throws sa nahibiling 26 segundos sa duwa nga maoy nagsilyo sa daog sa Sixers.
Dako sab og natampo si Tobias Harris nga mihipos og 23 puntos, walo ka rebounds ug pito ka assists alang sa Sixers nga midaog sa ikawalo nga higayon sa miagi nilang siyam ka duwa.
Si Kemba Walker mikolekta og 29 puntos, si Enes Kanter miiskor og 20 puntos ug milangkat og siyam ka rebounds, samtang si Gordon Hayward mipupo og 19 puntos, apan silang tanan nangaminghoy gumikan kay ang Celtics napilde sa labing unang higayon didto sa ilang korte karon nga season.
Ang Celtics nakasikit sa katapusang higayon sa iskor nga 109-110 human sa tres ni Jayson Tatum gumikan kay si Embiid miposa og lima sa unom niya ka free throws aron pagsalbar sa Celtics.
- Latest
