L.A. Lakers nakabawi

CEBU, Philippines – Nakarekober dayon ang Los Angeles Lakers human masugamak  dihang ilang gipilde ang Denver Nuggets, 105-96 sa NBA kagahapon didto sa Pepsi Center sa Denver, Colorado.

Sa gihapon, ang Lakers gipangulohan nilang LeBron James ug Anthony Davis nga parehong mipugnit og 25 puntos sud sa 36 minutos  nilang pagduwa.

Kontrolado kaayo sa Lakers ang duwa  human sila miposte og 60-49 nga labaw sa halftime dayon na ngadto sa pagkulit sa ika-18 nilang daog nga giatbangan og tulo lamang ka pilde.

Sa laing duwa, padayong nagmangtas si Luka Doncic dihang miiskor kini og 33 puntos uban ang career-high 18 rebounds ug lima ka assists sud lamang sa tulo ka kuwarter aron pangulohan ang Dallas Mavericks ngadto sa 118-97 nga demolisyon sa New Orleans Pelicans.

Si Seth Curry miamot og 19 puntos, samtang sila si Tim Hardaway Jr. ug Maxi Kleber mitali og 12 puntos matag usa alang sa Mavs nga nagkupot na karon og 14-6 record.

Sa laing aksiyon, si Jimmy Butler milusad og nagkayong opensiba sa overtime aron aswaton ang Miami Heat  nga mipakaging sa defending champion Toronto Raptors,  121-110.

Si Butler mitali og otso puntos wala pa gani usa ka minuto ang nakaon sa overtime aron pagtapos niini uban ang triple double. Mihipos siya og 22 puntos, 13 ka rebounds ug 12 ka assists.

Dako sab og natampo si Duncan Robinson nga mipatak og 22 puntos ug ingon man si Bam Adebayo nga mitimbre og 18 puntos alang sa Heat nga misaka sa ikaduhang puwesto sa East bitbit ang 15-5 record.