Lapu-Lapu Fiesta chessfest karong weekend
CEBU, Philippines – Kapin sa P20,000 nga ganting salapi ang giandam alang sa mga mananog sa 2019 Lapu-Lapu City Fiesta Chessfest karong Nobiyembre 16-17.
Ang unang adlaw sa aksiyon ipahigayon sa auditorium sa maong dakbayan, samtang ang ikaduha sa Hoopsdome sa Barangay Gun-ob.
Ang duha ka adlaw nga torneyo naglangkob og tulo ka mga kategoriya. Kini mao ang individual rapid open nga abli sa tanan, ang individual rapid nga eksklusibo lamang sa mga residente ug empliyado sa Lapu-Lapu City ug Cordova ug ang kiddies Under 14 rapid open.
Mobulsa og P5,000 ang makampiyon sa individual rapid open, samtang ang mopahiluna sa ikaduha ngadto sa ikaupat nga dapit mokubra og P3,000, P2,000 ug P1,000.
Ang top 5 makadawat og P3,000, P2,000, P1,000, P500 ug P500 sa individual rapid ug P1,500, P1,000, P700, P500 ug P300 sa kiddies U14 rapid open.
Ang registration nagkantidad og P100 sa kiddies, P120 sa individual ug P200 sa individual open. Alang sa dugang mga detalye, mahimong mokontak ni Jun Olis (0942-4641565).
Giorganisar sa Lapu-Lapu City Chess Club agi'g pagtambayayong sa Lapu-Lapu LGU ubos sa liderato ni Mayor Junard 'Ahong' Chan, ang maong kalihukan gituyo aron pagdugang og lamas sa tinuig nga pista sa dakbayan agi'g pangilin sa mahal nilang patrona, Virgen de la Regla karong Nobiyembre 21.
- Latest
