Raptors gisugat og daog

CEBU, Philippines —Mirehistro og career-high 34 puntos si Fred VanVleet alang sa  Toronto Raptors nga miabli pagdepensa sa ilang korona pinaagi sa 130-112 nga kadaogan sud sa overtime batok sa New Orleans Pelicans kagahapon didto sa Scotiabank Arena sa Toronto, Canada.

Wala sab magpatibin si Pascal Siakam nga mitali sab og 34 puntos sa mabungahong adlaw sa Raptors diin ilang giisa ang ilang championship banner ug dayon gidawat ang tagsa-tagsa nila ka mga championship rings.

Si Kyle Lowry  mihipos og 22 puntos ug ingon man si Serge Ibaka nga mipupo og 13 puntos  sa Raptors  nga mikastigo sa Pelicans, 13-5 sa dugang singko minutos sa aksiyon. Nagtabla ang duha ka kampo human sa regulasyon sa iskor nga 117-117.

Si Brandon Ingram mitapos uban ang 22 puntos aron pangulohan ang pilderong Pelicans.

Ang Raptors miduwa nga wala na si Kawhi Leonard nga mitapon sa LA Clippers, samtang ang Pelicans mitaak sa korte nga wala ang star rookie nilang si Zion Williamson nga dili makapakita'g aksiyon sud sa duha ka bulan human gioperahan ang na-injured niining tuong tuhod.