Barugi ang imong gisulti

CEBU, Philippines – Nanghinaut si Pinoy ring star Manny Pacquiao nga barugan ni Keith Thurman ang mga gipanulti niini batok kaniya sa panahon nga magbinukbukay na sila ibabaw sa ring duha ka bulan gikan karon. Si Thurman, ang WBA 'super' welterweight champion, nagpunay og bira gamit ang mga mahait nga pulong ngadtong Pacquiao, ang WBA regular welterweight champion, pagsugod sa duha ka siyudad nilang press tour aron ipublikar ang umaabot nilang away nga gikatakda karong Hulyo 20 (Hulyo 21 dinhi sa Pilipinas) didto sa MGM Grand sa Las Vegas, Nevada.

Didto sa New York sa miaging adlaw, si Thurman mibahad nga iyang ilansang ug paretiruhon si Pacquiao human sa ilang sangka.

Apan wala mahadlok niini si Pacquiao.

Matud pa sa bugtong eight-division world champion sa kasaysayan nga sayon ra kaayo sa iyang mga kontra ang pagbuhi og mga pulong, apan sa kanunay mausab ang dagan sa ilang baba sa adlaw sa away.

"It's easy for my opponents to talk before the fight, and I'm used to everything they say. But when we get to the ring, it changes, and it will change on July 20,"   matud pa ni Pacquiao atol sa ikaduhang hugna sa press conference nilang Thurman kagahapon didto sa The Beverly Hills Hotel sa Los Angeles.

Nagkanayon si Pacquiao nga dili niya estilo ang manganti kay buot niya nga ang iyang mga kumo maoy pasultion atol sa sangka nilang Thurman.

"He said he's young, but we'll see who looks young in the ring on July 20. I'm going to let my fists say everything for me," dugang pa niya.

Taliwala sa mga gibuhat ni Thurman, si Pacquiao mapasalamaton kay naghatag kini kaniya og dugang motibasyon aron pamatud-an ang iyang katakus ilabi na niadtong nagtuo nga talisaop na ang iyang karera sa boksing.