Power Forty St. Agustine Cup 2019 sugdan na
CEBU, Philippines – Pito ka teams ang magtigi sa kampiyonato sa Power Forty-St. Augustine Cup 2019 basketball tournament nga sugdan karong buntag diha sa Inayawan Sports Complex, Cebu City.
Pangulohan kini sa defending champion Water Market ni team manager Vez Eleguin uban sa Stronghold Insurance ni Atty. Flor Yosores, AMBL Tarpaulin Makers ni Alan Lim, LJR Ventures ni Engr. Edwin Rabaya, Team Sanchez nilang Gastner Sanchez, Tony Navares ug Gil Magallon, Team Rama nilang Romy Rama ug Jingjing Rama ug ang SGRE Mariners nilang Roger Gadiano ug Alan dela Rama.
Moduwa sila ubos sa single round robin format sa elimination diin ang top 2 teams awtomatik nga moabante sa semifinals round.
Ang No. 3 ngadto sa No. 6 moagi pa og tagakay nga quarterfinals. Kontrahon sa No. 3 mao ang No. 5 ug ang No. 4 kontra No. 6. Ang mga modaog maoy makaangkon og katungod sa pakigharong sa No. 1 ug No. 2 sa knockout semifinals. Ang makalahutay maoy magsangka sa finals ug ang mga pildero mag-ilog na lang alang sa ikatulong puwesto.
Tulo ka mga duwa ang ipahigayon karon diin unang magsangka sa alas-8 sa buntag mao ang Water Market nga moharong sa AMBL, sundan sa duwa tali sa Team Sanchez ug LJR Ventures sa alas-9, dayon ang sangka sa Stronghold Insurance ug sa SGRE Mariners sa alas-10:30.
Ang liga naumol pinaagi sa paningkamot ni El Presidente ug CESAFI head referee Edwin Dejacto Sr. inabagan sa tanang opisyales ug mga miyembro sa Power Forty Ballclub.
- Latest
