Embiid gipamulta'g $25t

Ang alas sa Philadelphia 76ers nga si Joel Embiid gipamulta og $25,000 (P1.25 million) gumikan sa dayag kaayo niining pagsaway sa mga reperi human sa ilang kapildihan ngadto sa Boston Celtics.

Atol sa post-game news conference human sila mapilde sa Celtics, 112-109 niadtong Miyerkules, si Embiid nagyawyaw sa mikropono dayong labay og hait nga mga pulong batok sa mga opisyal sa duwa.

Kalapasan sa lagda sa liga ang gibuhat ni Embiid hinungdan nga siya gisilotan. Dili pa lamang dugay, sila si Blake Griffin sa Detroit Pistons, JR Smith sa Cleveland Cavaliers ug Rudy Gobert sa Utah Jazz gipahamtangan sab og multa sa susamang salaod.

Kanter mipirma sa Blazers

Gipalig-on sa Portland Trail Blazers ang ilang kampanya sa Western Conferences pinaagi sa pagpapirma niini og kontrata sa beteranong sentro nga si Enes Kanter.

Ang 26-anyos nga Turkish big man nabira sa Blazers kay gibuhian man kini sa New York Knicks atol sa trade deadline  niadtong miaging Biyernes.

Gipili ni Kanter ang Portland kay sa Los Angeles Lakers ug uban pang teams nga interesado kaniya. Sa walo niya ka season uban sa Utah, Oklahoma City ug New York, si Kanter mi-average og 11.9 points ug 7.6 rebounds matag duwa.