Blackwater misalig gihapon ni Desiderio

CEBU, Philippines — Misalig gihapon si Blackwater Elite coach Bong Ramos sa abilidad ni Paul Desiderio bisan pa og igo lang siya mihimo og singko puntos sa iyang  unang duwa batok sa NorthPort Batang Pier niadtong Miyerkules.

Sumala pang Ramos  nga kuwang pa sa kompiyansa si Desiderio ug mao kini iyang kinahanglan nga palambuon aron mamahimo siyang epektibo nga player sa liga.

"Sinabihan ko talaga siya na 'Paul, kapag meron ka ng shot, wag ka mahiya. Kung tira mo, tira mo'," matud pa ni Ramos sa Philstar.com.

Ang Sugboanong point guard nga si Desiderio maoy No. 4 pick sa miaging draft bunga kini sa  nindot niyang gipakita sa UAAP uban sa University of the Philippines. Gilauman ni  Ramos  nga  molambo pa ang performance ni Desiderio karong gabii sa ilang duwa batok sa Meralco Bolts didto sa Ynares Center. 

====

GSC daog dayon sa tba Inter-Ballclub

Yoyo R. Abayan

CEBU, Philippines — Mihimo og kasikas si Noel Rabadon dihang mipauwan siya og walo ka 3-points alang sa Genuine Sports Club (GSC)/Poblacion nga walay puangod milubong sa Cyber/Bulacao, 134-102 pagsugod sa TBA Inter-Ballclub Basketball Tournament 2019 niadtong Domingo didto sa Poblacion gym, Dakbayan sa Talisay.

Sa kinatibuk-an, ang presidente sa GSC nga si Rabadon mirehistro og 36 puntos aron pangulohan ang maong kadaogan.

Mikawat sab og salida si Long Cosep nga mikadlit og 22 puntos ug Bobong Base nga mitikdol og 18 puntos sa Genuine Sports Club nga maoy midiktar sa tibuok duwa.

Ang Cyber/Bulacao gipangulohan sab nilang Romy Batiola ug Mendel Amatong nga parehong mitusak og 18 puntos, gisundan ni Bamba sa iyang 10 puntos.

Sa laing aksiyon, ang LABBA/Lagtang gisubhan sab og daog dihang ilang gipilde ang BTBC/Tabunok sa iskor nga 94-88.

Si Arnel Secretaria mipatuasik og 27 puntos aron mangulo sa opensiba sa LABBA nga maoy pirmeng naglabaw gikan sa pagsugod hangtod sa katapusang gutlo.

Sila si Dondon Iglamo ug Julie nagtampohay og 18 puntos alang sa LABBA/Lagtang.

Nausik lang ang 30 puntos ni Ricky Labajo kay wala kini makapadaog sa BTBC/Tabunok. Sila si Papap Cabanero ug Hacuna nagtampohay'g 16 ug 14 puntos matag usa.

Ang liga nahimo pinaagi sa paningkamot  ni league organizer Randy Gavas ug ang mga duwa gipadagan ni TBA commissioner Sammy Atillo.

Sa laing bahin, ang LGU mipukan sa Cavs sa ligas kaayo nilang duwa sa category C sa Genuine Sports  Club basketball tournament sa iskor nga 90-85.

Gipangulohan ni Wilman Capillanes ang LGU nga mikamada og 28 puntos, samtang sila si Dejos ug Alegado nag-amotay'g 20 ug 15 puntos sa maong kadaogan.

Ang pilderong Cavs gipangulohan sab  ni Lowe Badajos nga mipabuto og 22 puntos, gisundan ni Zardo Montellano sa iyang 16 puntos ug Totong Abay nga miabay og 15  puntos.