Canelo tuyo mokulit og kasaysayan

CEBU, Philippines – Ang pagsuwat og kasaysayan sa Mexican boxing maoy tuyo ni WBC, WBA, Lineal ug Ring Magazine middleweight champion Canelo Alvarez sa iyang paghagit ni WBA super middleweight champion Rocky Fielding karong Domingo didto sa Madison Square Garden sa New York.

Gituyo gyud ni Alvarez ang pagsaka og timbang aron lamang makaharong si Fielding nga iyang gilantaw nga usa ka dekalibre ug kuyaw nga kontra.

Gawas niini, giisip sab ni Alvarez nga usa ka lisud nga hagit ang iyang sagubangon gumikan kay manulong man siya sa teritoryo ni Fielding.

Hinuon, si Alvarez mipadayag sa iyang kaandam nga atubangon ang misyon nga nag-atang kaniya sa unahan kay nadasig siya mokulit og kasaysayan sa kalibotan sa boksing.

Sa iyang bahin, si Fielding miingon nga pahimuslan niya ang tanan niyang pabor, apil na niini ang iyang gidak-on batok ni Alvarez nga adunay halapad og kasinatian.

Si Fielding nagkupot og 27-1 nga baraha uban ang 15KOs, samtang si Alvarez dunay 50-1-2 record uban ang 34KOs.