Spartans nanghawod sa MSBC Friendship Cup
CEBU, Philippines — Ang Spartans nanginahanglan pa og dugang singko minutos sa wala pa pakganga ang Hard Court Kings, 77-68 sa kulbahinam nilang final match aron sakmiton ang kampiyonato sa Monday Squad Basketball-Cebu (MSBC) Season 4 Friendship Cup didto sa Casal's Village gym sa Barangay Mabolo, Dakbayan sa Sugbo.
Si Ian Ortega nga nakaduwa kaniadto sa University of San Carlos (USC) Warriors ug Southwestern University (SWU) Cobras sa iyang panahon sa kolehiyo, mipabuto og 27 puntos hinungdan nga siya maoy gibayaw nga Finals Most Valuable Player.
Si ex-USC Warrior Jax Bautista nga mao na karon ang head coach sa Paref-Springdale Titans, miamot og 18 puntos, samtang si Kevin Labay mitampo og 13 puntos sa Spartans ni team owner Brad Dablos.
Human sa 62-62 nga panagtabla sa regulasyon, ang Spartans mibubo sa nahibilin nilang enerhiya aron wanihon ang Hard Court Kings ni team owner Mark Anthony Ynoc sa overtime, 15-6.
Ang kanhi bitoon sa University of the Visayas (UV) Green Lancers nga si Randy de la Pisa maoy nangu sa Hard Court Kings uban ang 25 puntos. Si JL Manila mao lamang ang laing double-digit scorer sa HCK bitbit ang 13 puntos.
- Latest
