Baby Lancers 4-0 na
CEBU, Philippines — Ang University of the Visayas (UV) Baby Lancers nagsandig sa impresibong salida ni Joshua Yerro ug sa eksplosibo nilang opensa sa second half aron bihagon ang Cebu Eastern College (CEC) Dragons, 75-51 sa 8th Cebu Schools Athletic Foundation, Inc. (CESAFI) men's basketball tournament kagahapon diha sa Cebu Coliseum.
Si Yerro mikadlit og 17 puntos uban ang 13 ka rebounds, lima ka assists ug upat ka steals sa dihang ang Baby Lancers mipahugot og maayo sa ilang pagkupot sa liderato sa juniors division bitbit ang 4-0 record.
Si Mar Leandro Actub miamot og 16 puntos ug si reigning Juniors MVP Beirn Anthony Laurente dunay 12 puntos ug lima ka rebounds alang sa Baby Lancers nga naglabaw lang og kuwatro puntos sa halftime, 31-27.
Apan ang Baby Lancers milusad og mainit nga 27-15 rally sa ikatulong kuwarter ug dayon gilimitahan ang ilang kontra ngadto lamang sa nuybe puntos aron pagposte og 24 puntos nga demolisyon batok sa Dragons nga nakatilaw sa ikaduhang sunod-sunod nga higayon human mikulit og duha ka daog.
Sa laing duwa, ang Sacred Heart School-Ateneo de Cebu (SHS-AdC) Magis Eagles milansang sa una nilang duha ka sagunson nga daog karon nga season, apan nanginahanglan pa kining mag-agi og overtime sa wala pa tumbaha ang Southwestern University (SWU)-Phinma Baby Cobras, 75-69.
Si John Aguilar mipasud sa iyang lay-up nga maoy nakatabla sa iskor, 62-62 sa nahibilin nga 10 segundos sa regulasyon hinungdan sa overtime.
Nakasikit ang Baby Cobras sa katapusang higayon sa iskor nga 66-67 gumikan kay si Aguilar miposa og krusyal nga tres sa wala pa si Carlos Canoy nakaiskor pinaagi sa nindot niyang lay-up nga nakapaginhawa og lawom sa Magis Eagles, 72-66 sa nahibiling 1:38 sa aksiyon.
Si Koko Tuadles mitali og 20 puntos, si Casinillo midugang og 14 ug si Canoy miiskor og 11 alang sa Magis Eagles nga nagbitbit na karon og 2-2 record, samtang ang Baby Cobras nasugamak sa ikaupat nilang pilde sa lima ka duwa.
- Latest
