Ravena bag-ong head coach sa TNT

CEBU, Philippines – Ang kanhi PBA legend nga si Bong Ravena mao na karon ang  bag-ong head coach sa TNT KaTropa hulip ni Nash Racela.

Dugay na nga gidungog nga ilisan si Racela human kini mapakyas  pagpanindot sa dagan sa kampanya sa KaTropa sa nangaging  mga  konperensiya,  apan walay nagdahum nga ang kanhi TNT player nga si Ravena ra ang kuhaon isip hulip.

Si Ravena nga amahan ni national team player ug NLEX Road Warriors point guard Kiefer Ravena, dili hinuon bag-o sa trabaho sa coaching tungod kay dugay na kini nga nahimong assistant coach sa TNT.

Si Ravena maisip nga masaligan na sa TNT tungod kay nakaduwa na siya kaniadto sa maong koponan  niadtong tuig 2000 hangtod sa 2005. Nakatabang sab siya sa koponan pagsakmit og titulo niadtong 2003 All-Filipino Cup.  

Karong gabii, masukod ang abilidad niini  sa 'out-of-town' game dihang ang TNT moharong sa Rain or Shine Elasto Painters didto sa Iloilo City.

Ang KaTropa gusto nga makabaton og sunod-sunod nga daog ubos ni Ravena aron mapalambo ilang 2-4 win-loss record. 

Dili hinuon sayon ang sagubangon sa koponan tungod kay ang Painters moduwa sa labing unang higayon sa Governors Cup human sa taas nga pahuway tungod kay ang tanan nilang players gihuwaman  sa national team sa miaging Asian Games.