Nietes di gusto'g rematch

CEBU, Philippines – Kalimtan na ni ALA Gym  star   Donnie  'Ahas' Nietes ang  katapusan niyang away nga nakontrobersiya human gideklara ang sangka nga 'split draw' batok sa kababayan niyang si Aston Palicte niadtong Septiyembre 8 didto sa The Forum, California.

Inay makig-'rematch', si Nietes mipadangat og hagit ngadto ni  kanhi pound-for-pound king Roman 'Chocolatito' Gonzales  alang sa usa ka sangka.

Mikompisal si Nietes nga nasakitan siya sa maong resulta. Si Nietes   mao unta ang angay nga midaog sa bakanteng WBO super flyweight title, apan  ang mga hurado mipakanaog og hukom og 'tabla' nga nakapakontrobersiya.

Hapit tanang boxing experts nagkauyon nga si Nietes ang angay padag-on sa away tungod kay klaro nga gikulata niini si Palicte ug wala sila kauyon sa desisyon sa mga hurado.

"Dili na nato mausab ang desisyon sa mga judge. Gusto ra ko mag-move on ug focus ko sa sunod," matud pa ni Nietes atol sa press conference kagahapon didto sa Summit Circle Cebu Hotel.

Giklaro sa 36-anyos nga si Nietes nga dili na siya   interesado nga makig-'rematch' ni Palicte. 

"Wala na man seguro punto nga mag-away mi pag-usab. Kahibalo na man seguro tanan nga ako ang nidaog ato nga away," matud pa ni Nietes.

Gusto ni Nietes nga makasangka ang tulo sa mga sikat nga boksidor sa iyang dibisyon nga  sila si Juan Franciso Estrada, Srisaket Sor Rungvisai ug Gonzales. Apan gusto niyang unahon ang dugay na kaayong gidumtan niya nga Nicaraguan boxer nga si Gonzales nga lab-as pa gikan sa knockout nga kadaogan batok ni Moises Fuentes niadtong Domingo.

"Salig ko iya dawaton akong challenge. Nindot gyud for the fans nga mag-away ming duha," dugang pa ni Nietes.