Mas dakong CESAFI season moulbo karong sabado
CEBU, Philippines — Mas dako ug gipalambo pa nga 18th season sa Cebu Schools Athletic Foundation, Inc. (CESAFI) ang moulbo karong Sabado diha sa Cebu Coliseum.
Si CESAFI Commissioner Felix Tuikinhoy Jr., nagkanayon nga mas mahimong kulbahinam ang aksiyon sa CESAFI tungod sa daghang mga kausaban ug pagsulod sa dugang duha ka teams ang University of Cebu Lapu-Lapu/Mandaue (UCLM) ug Sisters of Mary School-Boystown.
Ang UCLM lahi nga koponan sa UC diin mosalmot sila sa pito ka sporting events, samtang ang SMS-Boystown magsilbe nga guest team sa paglusad sa Under-12 basketball division.
Aron usab nga mapaduol pa ang CESAFI sa mga fans, ang mga kadagkoan niini mihukom nga himoan og live coverage sa social media ang mga duwa, lakip na niini ang giatngan nga opening ceremony sa Sabado.
Gawas sa parada sa mga koponan, koronahan usab ang bag-ong 'Miss CESAFI 2018' sa secondary ug college level.
Sa laing bahin, si Gabby Cui sa Smart/PDLT group miingon nga ang ESPN5 makigtambayayong sa CESAFI alang unya sa usa ka TV coverage.
Si CESAFI President Bernard Nicholas Villamor mitug-an nga pabilin nga top contender ang University of the Visayas (UV) Green Lancers sa men's basketball ug laraw niini nga ma- 'grandslam' karon nga season.
Si Green Lancers coach Gary Cortes miingon hinuon nga nangandam sila sa lisud nga kompetisyon ug segurado siya nga maningkamot ang tanan nilang kaatbang nga koponan aron pagbaraw sa pangandoy sa UV. (BANAT NEWS)
- Latest
