Harden, Davis, James mga finalists pagka-MVP
CEBU, Philippines – Sila si James Harden sa Houston Rockets, LeBron James sa Cleveland Cavaliers ug Anthony Davis sa New Orleans Pelicans mao na lang karon ang nahibilin sa lista nga magtigi pagka-Most Valuable Player sa NBA karon nga season.
Nilang tulo, si Harden ang topscorer sa regular season nga mo-average og 30.4 points matag duwa, maoy paborito nga mohulip sa trono ni Russell Westbrook sa Oklahoma City Thunder isip MVP sa liga. Si Harden maoy nagtimon sa Rockets ngadto sa 65 ka daog nga naghimo kanilang topseed sa playoffs.
Samtang ang 33-anyos nga si James naglaraw sa ikalima niyang MVP award. Mga maanindot nga numero ang iyang gitala karon nga season diin siya adunay average nga 27.5 puntos matag duwa uban ang 8.6 rebounds ug 9.1 assists.
Kun ugaling masuwertihan, hayan nga si James makig-uban nilang Michael Jordan ug Bill Russell sa lista sa mga players nga midaog og lima ka MVP. Si Kareem Abdul-Jabbar maoy all-time leader uban ang unom ka MVP.
Labing sikit nga karibal nilang James ug Harden mao si Davis nga miaverage og 28.1 points, 11.1 rebounds ug 2.6 blocks nga maoy labing nindot sa iyang karera. Si Davis finalist sab sa "Defensive Player of the Year" uban nilang Rudy Gobert sa Utah Jazz ug Joel Embiid sa Philadelphia 76ers.
Magtigi isip "Rookie of the Year" mao sila si Donovan Mitchell sa Utah Jazz, Ben Simmons sa 76ers ug Jayson Tatum sa Boston Celtics.
Kun kinsay makadawat ning maong mga prestihiyosong pasidungog mahibaw-an karong Hunyo 26.
- Latest
