Tigbao midaog gyud batok kalubihan

CEBU, Philippines – Midaog  gyud ang team Tigbao human makalingkawas gikan sa mga hulga sa Kalubihan-Mt. View, 76-74 sa 26-above division sa Talamban Inter-sitio Summer League 2018 basketball tournament niadtong Martes sa gabii didto sa Talamban Sports Complex, dakbayan sa Sugbo.

Topscorer sa Tigbao nga aduna na karo’y 1-1 nga baraha mao si Carlo Velayo nga miburak og 20 puntos, samtang ang ikaduhang topscorer mao si JK Miñoza sa iyang 15 puntos, gisundan ni Yorgy Molijon nga adunay 11 puntos.

Ang napilde nga Kalubihan gipangulohan sab ni Ryan Lao nga mipabuhagay og 28 puntos. Lain pang nakaiskor og double figures sa Kalubihan mao sila si Nervi Bontuyan ug Jay Lacandula sa ilang 20 ug 12 puntos.

Labaw og 12 puntos  ang Tigbao sa tunga-tungang bahin sa first period, 14-2, apan gihinay-hinayan kini’g kitkit  sa Kalubihan.    Gawas nga naguba ang ilang duwa, mikagar sab ang mga tira sa Tigbao hinungdan nga nailog sa Kalubihan ang labaw sa unang higayon, 19-18  paghuman sa maong kuwarter.

Dali ra sab hinuon nailog og balik sa Tigbao ang labaw sa itsa ni Ramil Batican, 20-19. Miburot pa ang labaw ngadto sa 14 puntos, 60-46, apan takulahaw lang nga misikit ang Kalubihan, 70-71 sa nahibiling 1:52 sa duwa dihang mipasud og walo ka sunod-sunod nga puntos si Lao.

Misamot pa kakulbahinam ang duwa dihang misikit ang Kalubihan sa katapusang higayon, 74-75 sa nahibiling 9.7 segundos sa fourth quarter kortesiya sa tulo ka free throws ni Bontuyan, apan si  JK Miñoza mipasud og usa ka free throw nga maoy nagselyo sa kadaogan sa Tigbao.

Sa 25-under, ang Hillside midaog batok sa Tintay sa iskor nga 78-61, samtang gilubong sab sa Candahu-an ang San Roque-Nasipit, 79-58.

Ang tinuig nga liga giorganisar sa Talamban Barangay Council ubos sa liderato ni  Brgy. Capt. Dario B. Arcilla ug sa Task Force On Youth Development (TFOYD) ubos ni Nicole Gerona.

Ang mga duwa ubos sa superbisyon ni league commissioner Junjun Ferolino nga mao sab ang sports coordinator sa barangay sa abag ni Lee Bonusan.