Convergys, QBE naka-una sa E-Leagues finals

CEBU, Philippines — Ang Convergys Converters ug ang QBE Generals maoy unang mipadanak og dugo sa tagsa-tagsa nila ka best-of-three finals sa Tanduay Athletics CSCC E-Leagues for Basketball Season 13 niadtong Sabado didto sa City Sports Club-Cebu gym.

Sa Elite Classic, ang Converters mipaduol ngadto sa usa na lang ka tikang aron kab-oton ang ilang damgo nga maka-grandslam human gipaluhod ang Teleperformance All-Stars, 74-62.

Si Franz Dionne Dysam mipakita nga siya gyud maoy angayan nga ilhong MVP human mipabuhagay og 29 puntos uban ang upat ka assists, duha ka rebounds ug duha ka steals alang sa Converters, nga nagsandig sa nagkayo niining opensiba sa tunga-tungang mga kuwarter aron paglampaso sa All-Stars.

Alkansi sa unang kuwarter, 17-19, ang Converters mitubag pinaagi sa mainit nga 24-13 run aron pagposte og 41-32 nga labaw sa halftime.

Padayon nga gikulata sa two-time defending champions ang All-Stars sa ikatulong kuwarter, 18-11, aron pagpaburot sa ilang bintaha ngadto na sa 16 puntos, 59-43. Wala na makabawi pa sukad niadto ang All-Stars.

Dako sab og naambag si Aldene Jay Batino sa  Converters human kini miratsada og 14 puntos,14 ka rebounds, upat ka assists ug upat ka steals.

Si Mon Xavier Dico maoy nangu sa All-Stars uban ang 12 puntos ug lima ka rebounds samtang si Dean Junber Escalon mitali og 10 puntos sa pilderong kawsa.

Sa kampiyonato sa Evo League, si Johnrey Girasol mitapos uban ang 19 puntos, upat ka rebounds, tulo ka assists ug duha ka steals sa dihang gipiog sa QBE Generals ang Contact Solutions Flying Lemurs, 64-59, sa pasiunang duwa sa kaugalingon nilang serye.

Si Carlo Bernard Cabarrubias miamot og 10 puntos ug pito ka rebounds alang sa Generals nga wala na molingi pa sukad mi-abante og 10 puntos, 50-40, human sa tulo ka kuwarter.

Si Rodginald Antipala dunay 12 puntos, lima ka rebounds, upat ka assists ug duha ka steals sa Generals apan si regular season MVP Roberto Castro, Jr. nalimitahan lang ngadto sa 10 puntos. — (BANAT NEWS)