Cavs balik sa no. 1
CEBU, Philippines - Mipatuasik og 36 puntos si LeBron James aron pangulohan ang Cleveland Cavaliers nga mipilde sa Boston Celtics aron pag-angkon og balik sa liderato sa Eastern Conference, samtang ang tinguha ni Russell Westbrook nga isulat iyang pangan sa libro sa kasaysayan nadelatar.
Didto sa TD Garden, ang gipangagpas nga mainitong sangka tali sa managkaribal sa East nahug nga wa’y nada sa dihang gilat-an sa Cavs ang Celtics, 114-91. Human sa third quarter, klaro na ang resulta sa duwa human miabante ang Cavs og 24 puntos, 90-66.
Si James kuwang lamang og upat ka assists aron unta siya mokadlit sa ikatulo niyang sagunson nga triple-double.
Halos tanan nga mga tirador sa Cavs nangigo aron pagpahilom sa fans sa Boston didto sa ilang tugkaran. Si Kevin Love dunay 15 puntos ug 16 ka rebounds, samtang si Kyrie Irving mitampo og 19 puntos.
Didto sa Memphis, si Westbrook mitimon sa Oklahoma City Thunder ngadto sa 103-100 nga kadaugan batok sa Grizzlies, apan nakuwangan siya og usa ka rebound aron mokulit og bag-ong NBA record alang sa labing daghan nga triple doubles sa usa ka season.
Si Westbrook nga mitabla sa rekord nga 41 ka triple-doubles ni Oscar Robertson niadtong Martes, mitapos sa duwa uban ang 45 puntos, 10 ka assists ug siyam ka rebounds.
Duna pa hinuo’y nahabilin nga upat ka duwa si Westbrook aron mohimo og kasaysayan.
Sa laing mga aksiyon sa Western Conference, ang Golden State Warriors hingpit nang nakaangkon og homecourt advantage sa tibuok playoffs human gipukan ang Phoenix Suns, 120-111, samtang ang San Antonio Spurs nakasinati og dakung surprisa human sila gipiog sa nagkagidlay nga Los Angeles Lakers, 102-95. (BANAT NEWS)
- Latest
