GM Norm tuyo ni Yap

CEBU, Philippines - Ang Sugbuanong International Master nga si Kim Steven Yap magsagubang og misyon ug kini mao ang paglabni og Grandmaster norm sa iya unyang pagkumbati sa 19th Dubai Open Chess Tournament karong Abril 3-12 didto sa Dubai, United Arab Emirates.

Bug-at gyud nga tahas ang atubangon ni Yap gumikan kay makigbatok siya sa dili momenos 50 ka GMs ug super GMs sa tibuok kalibotan nga gipangulohan ni defending champion Romain Edouard sa France.

Ang 28-anyos nga si Yap nga maoy kasamtangang head coach sa University of Cebu varsity chess team, katapusang miduwa sa Dubai niadtong 2014 diin siya mitapos sa ika-20 nga puwesto human mitali og 5.5 puntos sa posibleng 9.0 puntos nga makuha. Sa susamang tuig, naka-gold siya sa Asian Chess Clubs League didto gihapon sa Dubai.

“Taud-taud na sab ko nga wala makaapil og ingon ani kabug-at nga tournament,” matud pa ni Yap. “Akong target karon maka-GM norm.” (BANAT NEWS)