Butler nagmangtas na sab

CEBU, Philippines - Sa adlaw diin ang managkaribal nga defending champion Cleveland Cavaliers ug Golden State Warriors nagmadaugon, si Jimmy Butler maoy mikawat sa labing daku nga atensiyon human siya mipabuhagay og 52 puntos sa dihang gisungag sa Chicago Bulls ang Charlotte Hornets, 118-111 sa NBA kagahapon didto sa United Center sa Chicago, Illinois.

Si Butler milangkat sab og 12 ka rebounds ug mipasa og unom ka assists nga igo kaayong nag-agak sa Bulls sa panahon nga si Dwyane Wade wala kaduwa kay mihubag ang tuhod ug si point guard  Rajon Rondo gibangko ni coach Fred Hoiberg.

“I think it’s an understatement to say Jimmy was phenomenal tonight,” matud pa ni Hoiberg agi’g pagdayeg ni Butler, kinsa mipasud og 15 sa 24 niya ka itsa ug kausa lamang masipyat sa 22 niini ka free throws.                        

Si Butler mipupo og 17 puntos sa katapusang kuwarter diin ilang giwani ang Hornets, 36-26 dayon na ngadto sa pagpakgang sa duha nila ka sunod-sunod nga pilde.

Didto sa Oakland, si Draymond Green mirehistro og triple-double sa 127-119 nga kadaugan sa Warriors batok sa Denver Nuggets.

Si Green mihimo og 15 puntos, 13 ka assists ug 10 ka rebounds, si Klay Thompson mipabuto og 25 puntos, si Stephen Curry adunay 22 puntos ug si Kevin Durant miamot og 21 puntos alang sa Warriors nga maoy labing unang team  nga   nakatali og 30 ka daog ning season.

Sa laing aksiyon, si LeBron James bisan mipakita og sintomas sa trangkaso nakamaneho gihapon pag-ayag og 26 puntos sa dihang gibihag sa Cavaliers ang New Orleans Pelicans sa iskor nga 90-82.

Gawas ni James,  nayayay sab si Kevin Love nga gibatyag og pagkahilo sa pagkaon, samtang si Kyrie Irving wala kaduwa gumikan sa hamstring injury.

Nakatampo hinuon si Love og 12 puntos ug 11 ka rebounds sa wala pa mobiya sa katapusang kuwarter.

Didto sa Houston, si James Harden miposte sa ikatulo niining sunod-sunod nga triple-double sa dihang ang Rockets nakabawi human maalkansi og 15 puntos aron pagpukan sa Washington Wizards, 101-91.

Gitapos ni Harden ang duwa uban ang 27 puntos, 10 ka rebounds ug 10 sab ka assists.

Samtang si Giannis Antetokounmpo miratsada og 26 puntos, 10 ka rebounds ug lima ka assists sa dihang gipahilom sa Milwaukee Bucks ang Oklahoma City Thunder, 98-94. (BANAT NEWS)