University of Cebu table tennis wala kadepensa

CEBU, Philippines - Pakyas ang University of Cebu (UC) table tennis team pagdepensa sa ilang trono sa 11th Universiti Teknologi Mar (UiTM) International Sports Fiesta didto sa Malaysia.

Ang UC mipahiluna lang sa ikaduhang dapit sunod sa Thailand human sila mapilde  sa standing, 1-3.   Mopauli sila bitbit  ang silver medal.

Hinuon bisan pa sa maong kapakyasan, ang mga Cebuano table paddlers mipakita gihapon sa ilang katakus sa maong torneyo pinaagi sa pagpilde sa mga koponan gikan sa  Brunei Darrusalam, Sri Lanka ug host Malaysia.

Ang UC team gibidahan nila ni  Dannel Jay Tormis, Val Stephen Jaca ug Lemuel Agbon.

Human sa ilang kampanya didto sa Malaysia, ang UC table tennis mangandam na sa umaabot nga serye sa mga torneyo nga naglakip sa Jawad’s Cup, Milo Little Olympics ug Cebu Schools Athletic Foundation, Inc. nga pulos gitakda sunod buwan. (BANAT PALARO)