Managsoong Sumalinog daog gihapon

CEBU, Philippines - Ang managsoong  Lyndon ug Ricardo Sumalinog sa dakbayan sa Talisay City milampos pagdepensa sa ilang titulo sa 2nd Sinulog Balik Baroto Regatta niadtong Sabado didto sa lapyahan sa Baywalk duol sa Cebu  City Senior Citizen’s Park.

Ang mga Sumalinog hapsay kaayong mibugsay sa ilang baroto dayon na ngadto sa pagtapos sa karera sa labing paspas nga oras.  Mipatak sila og usa ka oras, 11 minutos ug 56 segundos aron pagbulsa sa P50,000 nga ganti.

Gipakyaw sa mga Talisaynon ang nag-unang tulo ka luna  diin silang Gilberto Obrero ug Fransico Gamboa ang na-2nd sa oras nga 1:12:02 ug silang Mario Cañon ug Arnold Cabalda ang na-3rd sa oras nga 1:13.12.

Sila si Jimmy Pelones ug Jonathan Lopez sa Tuburan ang nalandig sa ikaupat nga puwesto sa oras nga 1:13.32, samtang ang taga Talisay na sab nga sila si Charlie Abapo ug Virgilio Jumao ang mikapyot sa ikalimang puwesto sa oras nga 1:15:52.

Ang second placer nakadawat og P40,000, samtang ang mipahiluna sa ikatulo hangtud sa ikalimang dapit midaog og P30,000, P20,000 ug P10,000.

Si kanhi Customs District collector David "Kuya Boy" S. Odilao Jr. malipayon kaayo sa kalampusan sa tinuig niyang kalihukan nga gisalmotan og mga mananagat gikan sa Talisay, Tuburan, Moalboal, Badian, Borbon ug Argao.    

"We started this last year with just a handful of participants and we are very glad that the number of participants this time have increased. I just hope that our Balik Baroto Movement will strengthen in the future," matud pa ni Odilao,ang tinamod nga ‘Amahan sa Sinulog’.

Ang maong lumba gipasiugdahan sa Balik Baroto Movement ug Bisdak Group (Hugpong sa mga Bisaya Alang sa Kauswagan ug Kaangayan, Inc.) ni Odilao inabagan sa kagamhanan sa dakbayan sa Sugbu, Sinulog Foundation ug Cebu Holdings, Inc.

Gipaluyohan sab kini nilang Mayor Democrito 'Aljun' Diamante, Jr. sa Tuburan, nga mao sab ang presidente sa League of Municipalities in the Philippines-Cebu Chapter, Butch Sepulveda sa Borbon ug Edsel Galeos sa Argao.