Lee, Andrin ‘hawod sa R399 run

CEBU, Philippines – Sila si Prince Joey Lee ug Cherry Andrin maoy nanghawod sa 12K open category sa R399  “Live Your Dream” Run kagahapon didto sa Cebu Business Park.

Si Lee maoy nidominar sa men’s division human niya gitapos ang dagan sud sa 41 minutos ug 9.46 segundos. Si Philip Duenas mitapos sa ikaduhang dapit sa oras nga 42:17:41, samtang si Riez Enriquez nalandig sa ikatulong puwesto sa oras nga 43:47:95.

Sa iyang bahin, si Andrin angayan nga magpasalamat ni SEA Games silver medalist Mary Joy Tabal nga miapil isip ‘guest runner’ lamang hinungdan nga siya maoy mibira sa women’s title sa oras nga 56:26:22. Nagsunod  niya mao sila si Sarah Lee Cuizon (59:23:18) ug Jinggay Lugay nga nahuman sud sa usa ka oras ug 44 segundos.

Ang igsuon ni Cherry nga si Lovely Andrin maoy gikoronahang hara sa women’s 6K sa oras nga 26:29:11. Mipatong sa nagsunod nga tulo ka puwesto mao sila si Karla Cosep (27:39:81), Aaliyah Mataragnon (27:49:06) ug Issa Priagula (29:31:06).

Ang top three sa men’s 6K mao sila si John Cliff Debulosan (20:28.50), John Balaga (22:00) ug Ramie Lawas (23:41). (BANAT NEWS)