Gilas mas maayo pa sa Iran ug SoKor
Katuloa’g unom ka tuig nga wala ang Pilipinas sa FIBA, apan sa pagbalik niini ning tuiga, dili na kini makalimtan pa.
Wala man makalahutay ang Gilas Pilipinas sa kampanya niini sa 2014 FIBA World Cup sa Espanya, apan nakita sa kalibotan nga misaka ang level sa dinuwaan sa Pinoy’ng basketbolista. Daghan na ang mga nanggawas nga balita, reaksyon ug analysis sa performance sa Pilipinas, kasagaran positibo ug nakuratan sila sa Filipino-style basketball. Dili na lang ko maghisgot pa og unsay maayo ug unsa angay untang gibuhat sa Gilas ug sa coaching staff. Ako na lang kini isalig sa mas angayan kay di man ko eksperto ani.
Angkunon nako nga na-excite ko og maayo ug bisan na gani kadtong ubang kababayan nato nga mga hinawayon sa abilidad natong mga Pinoy, gikulbaan usab sila sa matag duwa sa Smart Gilas.
Nakuha-kuhaan ang kahuot sa dughan sa mga Pinoy dihang midaog ang Gilas batok sa mas tag-as nga Senegalese. Bonus ra gani ni, kay ug sila pa, di manimaho ang Pilipinas sa FIBA.
Saludo ko sa Gilas sa ilang gipakita didto sa group stage eliminations, kay mas maayo pa kita og labok kun itandi kaparehas natong Asian teams gikan sa Iran ug South Korea sa ilang tagsa-tagsa ka mga groupings.
Ang mga Koreans butlog gyud, way daog sa Group C; samtang ang Iran ikalima sa standing sa Group A kay duna sila’y usa ka daog, apan sa ilang upat ka pilde, pulos sila gilubong og taga liog.
Walay team sa Group B nga nakontra ug nakapilde sa Gilas nga wala pangulbai – ang Croatia, Greece, Argentina ug ang Puerto Rico.
Usa ray ako ikasulti kon gusto kitang makasulod pagbalik sa 2019 FIBA World Cup, kinahanglan g’yud kita og mga dagku nga players, outside shooters ug labaw sa tanan dugang international experience.
* * *
Congrats sab sa Philippine Azkals human nila gitambakan ang Chinese-Taipei sa ilang sangka sa 2014 Peace Cup didto sa Rizal Memorial Stadium. Naatol kini sa duwa sa Gilas Pilipinas kontra Puerto Rico.
PAGTULON-AN: “Use only that which works, and take it from any place you can find it.” — Bruce Lee
- Latest
