Synchronized swimming sa iring

Matud pa ni kanhi Presidential Spokesman Atty. Salvador Panelo, mahimo’ng mag-atubang og legal nga hagit ug mga kaso’ng kriminal ang mga senator-judges sa impeachment trial ni Bise Presidente Sara Duterte kon ugaling ipadayon gayod nila ang pag-usab sa 2/3 voting requirement. Tataw nga gitinguha sa senate majority ang pagkonbikto sa bise presidente niini’ng pagtuki nila sa 2/3 voting threshold.  Apan matud pa sa akong palahubog nga amigo, “Kon wala la’y tinonto, mas sayon pa tudloan og synchronized swimming ang grupo sa mga iring kay sa pagkab-ot sa senado 2/3 voting requirement.” Muleeng!

Lain na ang trending

Lain na usab nga shooting incident ang nahitabo didto sa Banga National High School, Cotabato City kaniadtong Biyernes, Septyembre 18, diin tulo ka estudyante ang namatay ug walo usab ang samaran.  Gikataho nga usa ka Grade 9 student ang namusil ginamit ang 9mm nga pusil nga gipanag-iya sa iyang amahan.  Dakong tanghaga sa mga awtoridad ang tinuod nga rason ni’ng pagpamusil.  Gituohan sa daghang ginikanan nga dako’g impluwensa ang pagpunay’g tutok sa celfone.  Matud pa sa among katabang, “Sa una nga nihit pa ang celfone, snatching ra ang uso; karon nga ang tanan aduna na’y celfone, pagpamusil na sad ang trending.”  Atala lagee!

Mosamot kadugay

Giawhag ni DepEd Secretary Sonny Angara ang mga kagamhanang lokal (LGUs) nga kon modeklarar kini og class suspension, tinoon ug tin-awon pag-ayo ang lugar nga apektado aron kapugngan ang pagkahanaw sa learning time sa mga tinun-an.  Mora’g dili praktikal kining awhag ni Angara.  Dili mahimo nga tipik lang sa hurisdiksyon sa LGU ang ideklarar nga walay klase hilabi na kon dautan’g panahon ang hinungdan.  Reklamo pa sa mga ginikanan, “Dugay man gani ka-deklarar ang LGU nga walay klase, pili-on na ba hinuon kon unsa ra’ng lugara ang ideklarar.” Madahaan!

Lana sa aswang

Mipasalig ang pamunoan sa Bureau of Corrections (BuCor) nga dili gayod mapatuman sa South Korean drug convict nga si Park Wang-yeol ang laraw niini nga mo-eskapo sa prisohan pinaagi sa paggamit og drone.  Anaa karon sulod sa New Bilibid Prison ang Koreano.  Sa kahugot sa seguridad sa national penitentiary, kuli nga molampos ang maong laraw, gawas kon buhaton lang kini isip pasundayag ug inubanan sa tabang sa taga-BuCor.  Matud pa sa kanhi usa ka convict, “Mas motoo pa ko nga maka-eskapo ang Koreano kon lana sa “aswang” ang iyang gamiton.”  Pagkatoytoy!

Bantayog ang landfill

Nakigsabot karon ang Cebu City government ngadto sa Toledo City nga makagamit ang nahauna sa landfill sa Toledo City.  Ang padayon nga paghakot sa basura ngadto sa lungsod sa Aloguinsan dili malungtaron ug mahal usab.  Daghang suliran ang masugatan sa kagamhanan ug dakong pundo usab ang gikinahanglan aron lang malabay ang basura sa tukmang lugar.  Husto ang panahom nga “Ang tambakan sa basura (landfill) maoy labing dakong bantayog sa buhilaman ug ang tawo lamang maoy bugtong nilalang nga andam mobayad aron matabunan niini ang iyang mga kasaypanan.”  Fezteleern!