Silang Grace ug Chiz
Nakakita ko unsa kasuod silang Grace Poe ug Chiz Escudero dihang nagpa-interview sa Arangkada sa DYAB tungod sa ilang kandidatura pagka presidente ug pagka bise presidente niadtong 2016. Nananghid nga manigarilyo sa wala pa mosulod sa studio (pero nikomedya og hangyo nga dili hisgutan sa kahanginan ang ilang bisyo).
Atol sa interview, gipasundayag ni Chiz ang kamaayo niyang molusot: Nagpahiyom siyang nideklarar nga ang labing klarong ebidensiya nga dili American citizen si Poe (kay gipasanginlan man nga dili natural born Filipino atol sa kampanya) mao ang kakuwang niya og height.
* * *
Ilang pagkapilde ni kanhi Presidente Rodrigo Duterte ug kanhi Bise Presidente Leni Robredo wala makaputol hinunoa nipalambo sa ilang panaghigalaay. Sunod higayon nga nakit-an sa nasud ang ilang kasuod dihang nilampos si Chiz pag-kudeta ni kanhi Senate President Migz Zubiri sa niaging tuig: Gitugyan niyang Poe ang labing gamhanang Senate finance committee.
Nipasalig silang duha nga lahi sa nangaging katuigan himuon nilang mas transparent ang pagtuki sa 2025 budget. Nisaad pa gani si Poe nga imbes tagoan pasudlan niya og reporters ang ilang mga tigom sa bicameral conference committee.
* * *
Wala matuman ang ilang pagarpar. Ang 2025 budget gihulagway nga labing kurakot sa kasaysayan. Nakigkonsabo silang House Speaker Martin Romualdez sa paglaslas sa binilyon ka pesos sa budget sa edukasyon ug kahimsog kay gipaburot ang mga ayuda ug pork barrel projects. Maong silay mga sinumbong sa nag-ung-ong nga mga petisyon sa Korte Suprema nga nagkuwestiyon sa constitutionality sa budget.
Hangtod karon, wala moangkon ug labaw nang wala mangayo og pasaylo silang Escudero ug Poe sa makauuwaw nilang atraso.
* * *
Managlahi ang ilang baruganan sa kontrobersiya sa impeachment trial ni Bise Presidente Sara Duterte: Si Chiz usa sa 18 ka senador nga nibotar sa resolusyon sa pagpabalik sa articles of impeachment ngadto sa House of Representaties; samtang si Poe usa sa lima nga nisupak.
Mapupos nang ikaduhang sunudsunod nga termino ni Poe karong Hunyo 30. Maong wala na siyang kadagan para sa reelection niadtong Mayo 12. Si Chiz duna pay tulo ka tuig, ug dakong kahigayonan nga tungod sa iyang mga maniobra magpabiling presidente sa Senado, hangtod sa 2028. Ambot kon magdungan pa ba sila og panigarilyo.
* * *
- Latest
