Panghunaw

Gideklarar sa Department of Budget and Management (DBM) nga "inoperative" ang kapin sa P79M nga kabahin sa 2025 Annual Budget sa dakbayan sa Sugbo tungod kay wala ni malakip sa ilang Annual Investment Plan (AIP).

Kini nagpasabot nga dili mahimong gamiton sa syudad ang maong pundo.

Apan inay dawaton ang sipyat, nanghunaw si Mayor Raymond Alvin Garcia ug namasangil kang Vice Mayor Dondon Hontiveros nga maoy mabasol sa sipyat.

Matud ni Garcia nga gidali-dali ni Hontiveros og approve ang budget ordinance ug wala tarunga og review.

Nangatarungan si Garcia nga on leave siya dihang giaprobahan sa konseho ang annual budget ug si Hontiveros maoy acting mayor atol sa maong higayon.

Dugang pa ni Garcia nga gipirmahan dayon ni Hontiveros ang budget nga wala tarunga og review.

Apan gipasabot ni Hontiveros nga nisalig siya sa mga sakop sa konseho nga maoy nisusi sa budget sa wala pa nila aprobahi.

Dugang ni Hontiveros nga si Garcia maoy nagpreparar sa budget ug igo lang siyang niaprobar sa budget ordinance.

Husto si Hontiveros, nganong siya man tuod ang pasanginlan ni Garcia?

Nakalimot ang mayor nga siyay maoy nagpreparar sa annual budget. Siya maoy nagbutang sa mga items diha sa budget nga wala malakip sa ilang AIP.

Dili ba kataw-anan iyang lansis nga kinahanglan untang gi review og tarong ni Hontiveros ang budget ordinance sa wala siya mopirma.

Baliktad diay ang ilang proseso sa City Hall? Aprobahan diay una ang budget sa dili pa reviewhon?

Dili ba angayang gi review una ni Garcia ang iyang budget proposal sa wala pa niya iduso ngadto sa konseho?

Naganong laing tawo may iyang basulon sa iyang pagdaghag? Dili intawon ni basketball nga moingon siya nga "last touch" si Hontiveros busa siyay angayang manubag.