Mangilad bisan doktor?

Gikondenar sa Philippine Orthopedic Association (POA) ang mga gimantala sa social media nga mga orthopedic doctors nga nangilad sa publiko pinaagi sa pagbaligya ug pag-promote og mga produktong medikal nga walay pagtugot. Bisan sa natad sa medikal nga propesyon, anaa diay gihapon ang higpit nga kompetisyon nga nakaapekto sa ilang kita. Makapahinumdum sa tambalan sa among lugar nga matag tawo nga magpakonsulta kaniya, iya dayon ingnon nga “gihilo-an”, dayon tanyag nga, “Ako na lang pakyawon og P300 ang pagtambal kanimo; pero kon mahimo, mo-advance ko’g katunga kay ako’ng ipalit og tuba.” Madahaan!

 Mapa ra’y ato

Namahayag ang National Maritime Council (NMC) nga ang pagbutang sa West Philippine Sea diha sa Google Maps nagpadayag sa “nagkadako nga pagdawat” sa katungod sa atong nasud pag-angkon sa iyang kadagatan.  Maingon nato nga ang pag-ila sa Google Maps sa West Philippine Sea nga kabahin sa atong maritime zone usa na ka kadaugan ni’ng padayon’g pagpangilog sa China sa atong teritoryo.  Apan matud pa sa akong amigo, “Sa kinaiya sa China, basin igo lang sila moingon nga ‘Inyo na lang na’ng mapa, pero amo gihapon ang kadagatan’.”  Fezteleern!

 Problema sa panan-aw

Misulat si Senior Coroner sa Lancashire, United Kingdom nga si Dr. James Adeley, ngadto sa ilang  Transport Secretary alang sa hugot nga pagpatuman sa balaod kabahin sa mga tigulang nga driver nga mokuha gayod og eyesight test human sa kamatayon sa upat ka tawo nga naligsan sa motorista nga adunay suliran sa ilang mata.  Tinuod nga dakong risgo sa pagmaneho kon adunay suliran sa panan-aw.  Makapahinumdum sa driver nga pugsanon’g nangutana sa iyang amigo kon aduna ba’y mga penguin sa ilang lugar.  Sa dihang gitubag siya sa iyang amigo nga wala, mituaw gilayon ang driver sa pag-ingon, “Daan pa gyud ko, madre lage to ako nadasmagan.”  Pagkatoytoy!

 Wala gamita ang “coconut”

Gikonsiderar karon sa Philippine Coconut Authority (PCA) ang pagpatuman og polisiya nga magseguro sa suplay sa lubi sa nasud. Sumala sa datos sa PCA, kusog ang pagsaka sa presyo sa kopras tungod sa kusog nga demand sa ubang nasud sa coconut oil ingon man sa kakulang sa suplay.  Dili malalis nga usa sa atong dako nga economic base ang lubi.  Busa, makapahibulong ngano nga karon pa mopatuman ang PCA og polisiya nga mopanalipod ug mohatag og kaseguroan sa atong kalubihan.  Komento pa sa akong amigo, “Sa ka-uyamot sa atong coconut industry, tataw nga wala mogamit sa ilang “coconut” ang taga-PCA.”  Muleeng!

 Sa shoppee ra mopalit

Mimahal na karon ang presyo sa karne’ng baboy sa Cebu City nga matud pa ni Erwin Gok-ong, ang presidente sa Cebu Market Vendors Multi-purpose Cooperative, nagsugod pa niadtong Marso ang pagsaka sa presyo niini.  Mora’g dili na man panumbalingon sa katawhan ang mga pagsaka sa presyo sa palaliton kay daw naanad na man lang sila. Kay matud pa sa akong silingan, “Adto na man lang ko sa Shoppee ug Temu mamalit.  Daghan ang kapilian, barato pa unya ihatud pa sa balay.  Unya kon walay ikabayad, pila ray pagtago aron ma-return.”  Ateerr!