Kaitom nilang Sara ug Imee
Dunay problema ang ITIM (Inday Trusts Imee Marcos) campaign video nilang Bise Presidente Sara Duterte ug Senador Imee Marcos. Dili ang gisul-ob kay pulos sila angayang mag-itom (gawas nga pulos nigamay nga tan-awon). Kon dili ang ilang mensahe nga napulos itom:
• Gihulagway nila nga itom ang mga problema maong nagbangotan ang nasud (gutom, krimen, inhustisya ug pagpanggukod sa politika); pero
• Itom sab ang ilang mga sulbad (itom ang kolor sa pag-unong ug itom ang kolor sa pakighiusa); ug
• Itom pa gyod ang bag-ong slogan (Ilaban ang tama, itama ang mali).
* * *
Samtang mamugnaon ang mga paagi sa ilang paghatag og kahulogan sa itim (nga posibleng sinuwat sa paboritong direktor ug propagandista ni Imee nga si Darryl Yap), angay silang pahinumdoman nga kon naproblema sila pag-ayo sa itom dili maayo nga ang sulbad itom sab.
Mas katuohan sa mga botante ang ilang katakos pagsulbad kon mobalhin sa kolor nga puti. Naglisod hinuon ang viewers sa among programang “Baruganan” sa YouTube paghatag og mas undanon nga kahulogan sa PUTI (Palihug, Undangi Tawon, Imee; Padulong Unlod Ta Ini; ug Pasmo, Utang, Tanan Impas).
* * *
Klarong dinalidali ang ilang video shoot kay tulo ka semana na lang ang kampanya. Ambot kinsay mas desperada nila:
• Si Imee ba nga nitibugsok pag-ayong ratings bisan sa binilyon ka pesos niyang gasto maong magpa-endorse na lang sa politikong nihulga pag-ugkat sa patayng lawas sa iyang amahan; o
• Si Sara nga puslan mang napriso ang amahan sa The Hague ug nag-ung-ong nang impeachment trial sa Senado, mo-endorse na lang bisan sa utok sa higanteng budol sa UniTeam sa 2022.
* * *
Laing nataligam-an nilang Sara ug Imee:
• Pulos sila dagkong haligi sa administrasyon nga ilang gisaway, busa isip bise presidente ug senador may mahimo unta sa pagpaubos sa presyo sa palaliton ug pagpagaan sa kakabos; ug
• Pulos sila sakop sa higanteng mga dinastiya nga maoy responsable sa tanang kaitom nga nahiagoman sa nasud ug sa katawhan (lapad nga kagutom, bangis nga inhustisya, nagkagrabeng pangurakot ug pinatuyangan nga pagpahimulos sa gahom); sa laktod
• Silang duha dakong bahin sa nagbuntaog nga mga problema ug busa walay katungod nga magpatuo sa mga botante nga sila ra sab ang sulbad.
* * *
- Latest
