Pag-analisar sa politika

Karon nga nahuman na ang pag-file sa mga Certificates of Candidacy sa mga kandidato sa eleksiyon sunod tuig, makita na nato nga dili kakumpiyansaan ang mga nagpapili.

Sa upat ka midagan pagka mayor ug bise mayor, ug bisan na sa pagka kongresista dinhi sa Cebu City, sila pulos mga lig-on. Sa mga konsehal hinyon, dunay mga klaro kaayong pildehonon.

Unahon nato ang pagka mayor. Ang nanagan mao sila si Mayor Raymond Alvin Garcia, suspended Mayor Michael Rama, kanhi Customs Commissioner Yogi Ruiz ug Nestor Archival. Silang tanan mga lig-on nga kandidato. Bisan og si Rama gisilotan sa Ombudsman og dismissal sa serbisyo, apan sigurado siya nga aksyonan sa Supreme Court ang iyang gisang-at nga petisyon batok sa Comelec.

Ang argumento ni Rama nga kon dili pa gani final ang desisyon nga magpatangtang sa serbisyo nga gimando sa Ombudsman, dili pa mahimo nga pugngan ang usa ka tawo nga molansar og pwesto sa kagamhanan.

Ari ta sa ubang nagpapili, sama sa kongresista. Maingon nato nga pulos sila lig-on kay gisabak man og mga partido ingon man grupo sa mga politiko.

Si reelectionist Congressman Cutie Del Mar gisabak sa grupo ni Mayor Raymond Garcia, ug si Mary Ann delos Santos gituboy usab sa grupo sa BOPK.

Sa South district, mao sab, si Bebot Abellanosa gituboy sa BOPK samtang si reelectionist Congressman Edu Rama sa grupo sa Barug-Team Rama.

Sa pagka konsehal, maglibog ang mga tawo kay daghan kaayo nga mga iladong konsehal nga namalik sa pagpapili sa pwesto. Unya, dunay mga susama og apelyido, sama sa Osmeña, Abella, Archival ug Abellanosa.

Pero ang akong ikasulti nga dili kasiguroan nga abi kay ilado ka og apelyido nga modaog ka na, gawas sa mga incumbent nga naila na ngadto sa mga botante.

Sa mga Osmeña, aw sigurado na nga makapabor si Junjun Osmeña kay reelectionist na man.

* * *

Pag-file sa mga kandidato sa ilang Certificates of Candidacy didto ra ko sa media center naglantaw sa mga kandidato, wa ko moapil sa pag-interview.

Gianinaw lang nako kon kinsa ang angayan nga mangatungdanan, base usab sa ilang mga abilidad, Gani, bisan pa og ngilngig ka og abilidad apan naa lagi mga ilado na kaayong kandidato, tungason na kaayo ang pagdaog.

Kon ang mga botante dili mapasabot pag-ayo nganong ang usa ka kandidato angay’ng pilion, sigurado nga magpataka na lang sila sa pagbotar.

Pero klaro kaayo ang mga pildero unya sa eleksyon. Aw, hinoon, sa mga bag-o nga kandidato unya dili pa gyud mogasto alang sa mga proyekto nga makaayo sa publiko, sigurado gyud nga yam-iran ra sila sa mga botante.