EDITORYAL - Kolurom nga pasaheroan

Dunay gibanabanang 10 mil ka mga tradisyonal nga jeep pasaheroan ang gikonsiderar na karon nga kolurom ug sugdan na og dakop kun mamasahero gihapon sa kadalanan sugod kagahapon, Mayo 16,2024.

Ang gobiyerno mihatag og deadline niadtong Abril 30,2024 para sa tanang transport operators ug mga drivers nga motuman sa transport consolidation aron makapadayun gihapon sila og pamasahero.

Kun nisanong sa consolidation, magamit pa gyud unta nila ang ilang karaang jeepneys aron mamasahero samtang nagpaabot maabot ang mga modernong jeepney nga ilang gipalit pinaagi sa pag-abag sa bangko nga aprubado sa Department of Transportation.

Gawas pa niana, bisan dunay deadline, gihatag pa gyud sila og lugway nga 15 ka adlaw aron makaapas pa sa consolidation, apan napupos na kini niadtong Abril 15,2024.

Kung buot tan-awon, taas kaayong panahon ang gihatag sa gobiyerno para nila aron maghugpong ngadto sa usa ka kooperatiba.

Apan naa lang gihapoy gibanabanang 10 mil ka mga karaang PUJs nga wala mosanong, nagpasabot niini nga wala na silay interes nga mamasahero?

Usa sa mga gireklamo sa transports groups mao ang kamahal sa matag unit sa modernized jeepneys. Dili kini ikalimod kay modagan man og kapin usa ka milyon ang matag usa niini.

Apan kun tan-awon sab ang kalainan, pwerteng layoa, airconditioned, mas limpyo ug moderno ang mga bag-ong pasaheroan karon. Usa pa, mao na sab kini ang gusto sa mga sumasakay karon.

Kagahapong adlawa nagsugod na ang pagpanakop sa mga kolurom nga jeepneys didto sa Manila, sunod nga mga adlaw sugdan sab ang pagpanakop dinhi na sa Kabisay-an.

Duna gyuy mga drayber nga mawad-an gyud og panginabuhian tungod niini, apan dili husto nga ang gobiyerno maoy basulon sa ilang gidangatan, kay pila naman ka tuig kining giplano ang modernisasyon sa transport sector, mayoriya na gani sa maong sektor ang nisanong, nganong duna may uban nga wala?