Katorse

Nisurok akong dugo kagahapon sa buntag. Mokaon na unta ko sa pamahaw kuyog sa akong mga trabahante sa dihang nasigpatan ko ang balita nga dunay bata katorse anyos nga nihimo intawon sa iyang module assignment sanglit suspendido man ang face to face classes gumikan sa kainit.

 Ang bata gipusil patay sa wala hiilhi nga mamumuno. Giyawaan gyud tingali ang naghimo sa ingon ug kun wala mayawai, yawa gyud mismo ang naghimo sa ingon! Lisud sab katuohan nga dunay dakong atraso ang bata. Tingali iyang ginikanan dunay atraso o sa laing anggulo trip gyud sa criminal o dili ba kaha psychopath.

Sa laing bahin mahimong adik ang naghimo sa ingon kang kansang trip mao ang mopatay sa maong bata nga niadtong higayona walay igong kasayuran nga kadtong higayona samtang nagtubag siya sa iyang assignment niadtong tungora.

Nagkadautan na gyud ang mga tawo karon. Si bisan kinsa mahimong biktimahon. Gikan sa pagpanglugos hangtud na sa pagpatay wala pay labot sa budol ug ang pagpakigkunsabo sa mga mapahimuslanon ug aroganteng mga lideres.

Sa panahon karon bisan ang suod dili mahimong kasaligan kay lisud simbahon ang ilang gihunahuna. Sa laktod ning atong panahon karon dili na gyud seguro ug angayan lamang nga doblehon nato ang atong pagka mabinantayon kay daghang mga tawo nga wala sa ilang hustong panghunahuna ug nga gigamhan sila sa tumang kadautan nga hangtud ang ilang tanlag nahimong nahisalaag.