Akong tambag

Kon ang sunod nga Sinulog Grand Parade karong 2025, adto gihapon ipahigayon sa South Road Properties (SRP), kinahanglang andamon kini daan labing menos unom ka buwan sa dili pa ang Fiesta Se or.

Dili kay anha na magkara-kara sa paghimo og stage ug covered platform para sa mga manan-aw, kon pila na lang ka semana ug piyesta na.

Dihang didto si Mayor Michael Rama sa Melbourne, Australia, ug mitawag siya nako kaniadtong Disyembre, ug ako siyang gipahinumdoman nga kinahanglang sugdan na ang pagpangandam sa mga kalihokan sa Sinulog.

Ang gipasabot nako mao ang pagpabarog na sa stage, sa platform, ug sa mga bleachers nga anha ang mga manan-aw manglingkod. Giingnan ko ni Mayor Rama nga may naglihok na niini nga mga gimbuhaton.

Aw, motuo ko sa gisulti sa mayor, apan niadtong higayona wa pa ko makakita nga dunay nagtrabaho sa akong giingon nga angay na nga andamon.

Paglabay sa pipila ka adlaw, nabalita sa mga media nga duna nay mga opisyal sa Cebu City Hall nga miadto sa SRP ug ilang gitan-aw ang dapit nga maoy buhatangan sa stage.

Ang tinuod, gipangulbaan ko kay mga usa na lang ka semana, ug piyesta senyor na, apan wa pa gihapon mahuman ang pagtukod sa stage ug sa covered structure didto sa SRP nga adto ang mga bisita magpahimutang.

Kon sugdan pagsayo ang pagpangandam alang sa kalihokan sa Sinulog Grand Parade, mahimong makamugna pa gani og grandstand aron ang molingkod sa likud dili masalipdan sa mga anaa sa atubangan.

Unya, ang mga bleachers nga ipahimutang sa daplin sa parade route, mahimong kabutangan pa og atop aron nga dili tawon mapagba sa init ang mga manan-aw, ug kon mag-uwan, dili sila mabasa.

Kon pangandaman pagsayo ang pagbutang og stage, grandstand, mga bleachers, unya butangan kini og atop, tingali kadtong mga out-of-town contingents nga gikamingawan sa mga tumatan-aw, mangapil na gyud karong sunod tuig.

Angay nga molihok gyud pag-ayo ang mga hingtungdang opisyal kay matud ni Mayor Rama, ang kalihokan karong sunod tuig, tawgon na og Sinulog sa Sugbo Philippines 2025.

* * *

Kanunay ko nga makabasa og report nga padayong nasinati nato karon ang El Ni o, kun init nga panahon nga makapahubas sa mga tinubdan sa tubig.

Aw tingali, ang ubang mga lumulopyo dinhi sa Cebu City ug sa ubang dapit nakasinati na nga minihit na ang inyong suplay sa tubig.

Angay gyud ta nga magpasalamat sa JE Hydro Bio-Energy Corporation kay tungod sa 25,000 ka cubic meters nga tubig 125,000 ka baril) nga gisuplay nila sa MCWD kada adlaw, wa kaayo magnihit ang tubig sa MCWD.