Pahimangno

Aduna nay daghang billboard nga naglaray sa South Road Properties sa dakbayan sa Sugbo nga nagmando sa mga motorsiklo pag-agi kanunay sa motorcycle lane sa tuong bahin sa Cebu South Coastal Road.

Gani adunay usa ka opisyal sa Cebu City Transportation Office ang miingon nga padayon silang mag-monitor sa CSCR sa habig sa siyudad sa Sugbo aron pagbantay sa mga motorcycle rider pagsunod sa lagda.

Kini aron kalikayan ang disgrasya. Dili ikalimod nga mayoridad sa aksidente diha sa CSCR naglambigit sa mga motorsiklo nga walay habas nga nag-ikis-ikis sa maong karsada hinungdan sa pagkabangga sa mga dagkong sakyanan.

Apan bisan pa man niining subsob nga pahimangno gikan sa kagamhanan, akong naobserbahan nga padayon gihapon ang pagtadlas sa ubang motorsiklo sa dili ilang lane diha sa CSCR.

Matag adlaw ako mag-agian sa SRP gikan sa akong panimalay sa dakbayan sa Talisay padulong sa akong opisina sa downtown area sa siyudad sa Sugbo. Ug ako mismo saksi niining mga motorsiklo nga pataka lamang og pabulhot sa dili ilang lane.

Mora na ko’g gubang plaka nga sigeng balikbalik niining mao nga isyu tungod kay hagbay ra nako kining gisang-at ngadto sa atensiyon sa hingtungdan. Ug hinaut nga hingusgan na sa kagamhanan ang pag-aksiyon batok niining mga masupilong motorcycle driver.

Kay sayang kining giugbok nga mga billboard nagpahimangno sa mga motorcycle riders sa pag-agi sa insaktong lane kon dili kini tumanon.

Mao nga kinahanglan nga adunay subsob nga pag-monitor aron madisiplina kining mga badlongon.

Alang kining maong pahimangno sa kaayohan sa mga motorcycle rider, aron sila malayo gikan sa peligro. Apan makasapot usab tungod kay aniay mga pipila nga kulang gayud sa disiplina ug dili mosubay sa lagda.