EDITORYAL - Nganong tambalan kun way sakit?

Pipila ka dakong opisyal sa gobiyerno ang padayong nangusog nga himoong mandatory ang Reserve Officers Training Corps kay mao ra kunoy nakitang paagi aron madisiplina ang mga Pilipino ug magpakita og tinud-anay nga pagmahal sa nasud.

Duna say uban nga nagpaluyo niini ang miingon nga makatabang kini og dako sa pagpangandam sa nasud panahon nga dunay katalagman sama sa mga bagyo, linog ug labaw sa tanan, reserbang pwersa nga makapanalipod sa nasud kun magkagiyera.

Gawas sa ROTC, duna say nagsige og sulsol nga himuong mandatory ang military service sa mga nag-edad gikan 18 anyos pataas.

Ang rason gihapon, aron kuno madisiplina ug aron mahimong matinud-anon ang tanan sa pagmahal sa nasud. Kay ngano, mas daghan diay ang dili disiplinado sa sosyodad sa Pilipinas karon?

Ambot unsay nasulod sa ilang hunahuna nga mao ra man kini ilang gisigehan og balik-balik nga paagi aron kuno madisiplina ang tanan. Unsa diay ilang plano sa nasud, himuong garrison o kampo?

Nganong dili nalang kaha nila palig-unon ang social services sa gobiyerno aron nga walay pamilyang magkamang sa kakabus?  Sa samang higayon, ang pundong gusto nilang gamiton anang mandatory service o sa ROTC programs adto ibubo sa law enforcement agencies aron mas sopistikado sila sa paghimo sa ilang trabaho nga mao ang pagpakgang sa mga kriminalidad.

Nganong di man nila pangitaon gyud ang mga pamilyang nagkinahanglan gyud og tabang ug gahinan sila og pundo aron dili mahisalaag sa dautan ang ilang mga anak?

Dunay Pantawid Pamilyang Pilipino Program (4Ps), dunay ayuda sa mga tinun-an sa mga indigent families, duna say mga cash for work program mga programang dako kaayo og natabang pagkatinuod apan kuwang gihapon sa pundo.

Kani unta maoy tutokan nga palambuon, kay mag-unsa man nang daghang gradwado og ROTC o mga nakaserbisyo sa militar kun human sa ilang mandato sa serbisyo, magutman na ilang pamilya?

Duna nay National Service Training Program nga diin naapil ang ROTC, CWTS o Civic Welfare Training Service ug uban pa nga nagtudlo sa kabataan pagmahal sa nasud ug sa ilang pagka Pilipino.

Gani ang ubang produkto aning ubang programa sa NSTP nakaprodyus naman og daghang propesyonal nga dako karon og natampo sa kalamboan sa nasud.

Nganong tambalan man kun wala may sakit? Basin sayop lang ang diagnosis.